Blŭ hrăm tinei, Khua knŭk kna Phạm Minh Chính bi klă hlăm klei tŭ mbĭt mơ̆ng lăn čar mâo klei đru mguôp yuôm bhăn mơ̆ng phung yơng, hlăm anăn mâo êpul Nam tông Khmer. Khua knŭk kna bi mklă Đảng, Knŭk kna gĭr ktưn nanao kyua klei trei mđao, jăk mơak mơ̆ng yang ƀuôn, răng mgang klei dưi anak mnuih, klei êngiê hluê đăo mơ̆ng mnuih ƀuôn sang; hlăm anăn mâo klei mđing dlăng, kriê dlăng kơ phung đăo yơng mơ̆ng êpul Nam Tông Khmer.

Bi ala kơ Khua gĭt gai Đảng, Knŭk kna, Khua knŭk kna hơêč hmưi kơ phung đăo yơng, mnuih ƀuôn sang  Khmer ƀri gưl knăm mơak Sen Dolta thŭn 2023 leh anăn čang hmăng kơ mnuih ƀuôn sang Khmer mă bruă tŭ jing, êđăp ênang, klei hdĭp mda ƀrư̆ jăk mơak, trei mđao; Khua knŭk kna mtă kơ Đảng, bruă sang čư̆ êa, mặt trận čar Trà Vinh kriê dlăng jăk hĭn kơ klei hdĭp mda mnơ̆ng dhơ̆ng leh anăn ai tiê kơ mnuih ƀuôn sang./.