Hlăm wưng êgao, klei mjĕ giăm bruă kđi čar, bruă hŏng tač êngao Việt Nam – Lào lŏ dơ̆ng đĭ kyar jăk siam, bi mguôp, đăo knang, dua tĭng mkŏ mjing tŭ dưn Klei kƀĭn tal 46 Dhar bruă mlir knŭk kna Việt Nam – Lào (7/1/2024) leh anăn klei kƀĭn grăp tuôr dua Đảng thŭn 2024 (26/2/2024); mkŏ mjing dŭm gưl nao čuă mơ̆ng khua gĭt gai gưl dlông leh anăn dŭm gưl. Việt Nam ară anei mâo 241 hdră duh bi liê ti Lào hŏng ênoh êbeh 5,5 êklai dolar Mi, lŏ dơ̆ng rơ̆ng dôk tal 3 hlăm dŭm ala čar, krĭng wăl ( êdei kơ China, Thailand).

Hnơ̆ng klei mnia mblei Việt Nam – Lào 10 mlan hlăm thŭn 2024 mâo 1,7 êklai dolar Mi ( đĭ êbeh 28% mkă hŏng wưng anei thŭn 2023). Dua tĭng lŏ bi mguôp kjăp, bi sa ai hŏng hdơ̆ng pô hlăm dŭm klei kƀĭn alŭ wăl leh anăn tar rŏng lăn, boh nik hlăm hdră ASEAN, Êpul hgŭm lu ala čar leh anăn dŭm hdră êlan krĭng wăl. Hlăm thŭn 2024, Việt Nam hur har sa ai leh anăn đru kơ Lào klam ngă tŭ jing dŭm bruă klam yuôm bhăn msĕ si Khua gĭt gai ASEAN 2024, Khua gĭt gai AIPA 45.