Aguah mbrue, Khua knŭk kna Phạm Minh Chính mâo leh mmông mă bruă hŏng êpul khua kiă kriê bruă Đảng čar Kon Tum kơ klei mđĭ kyar bruă duh mkra ala ƀuôn, lehanăn mtă kơ čar brei mâo hdră êlan mđĭ kyar pral lehanăn kjăp. Leh hmư̆ klei bi êdah mơ̆ng phung khua phŭn dhar bruă, Khua knŭk kna bi mni kơ dŭm boh tŭ dưn čar kontum mâo leh. Lehanăn khua knŭk kna kčĕ kơ dŭm bruă awăt êdu năng bi mghaih msir hĕ.

Hlăm wưng tinăp, Khua knŭk kna mtă bi hlue ngă hdră mtrŭn klei bi kƀĭn prŏng Đảng 13, hdră mtrŭn mrô 23 mơ̆ng phŭn bruă kđi čar, lehanăn hdră mtrŭn mơ̆ng klei bi kƀĭn prŏng Đảng čar, ngă ênŭm 05 klei bhiăn mkŏ mjing lehanăn bruă ngă mơ̆ng Đảng. Mâo klei thâo bi mguôp nanao, čŏng kpưn đĭ hŏng klei mĭn mrâo, pai mă djăp mta klei găl, thâo ba yua mnuih kreh knhâo pioh mđĭ kyar bruă knuă. Mbĭt hŏng anăk khua knŭk kna lŏ mñă, mđing kơ bruă mđĭ kyar mtah, duh mkra mrô, duh mkra kluôm. Mâo hdră êlan mđĭ kyar hơĭt, bi mguôp klei duh mkra mơ̆ng čar pô hŏng dŭm čar ktue hang ksĭ hlue êlan dơ̆ng prŏng mrô 14, 24 lehanăn knăm phă knông lăn Việt Nam - Lào - Cam-pu-chia.

Êlâo anăn, hlăm hdră mă bruă ti čar Kon Tum, Khua knŭk kna Phạm Minh Chính mbĭt hŏng êpul mă bruă nao ksiêm dlăng dŭm anôk bruă, hdră bruă duh mkra- ala ƀuôn ti čar Kon Tum. Khua knŭk kna Phạm Minh Chính leh anăn êpul mă bruă ktuê dlăng hdră kčah mđĭ kyar pui kmlă êran hŏng ai angĭn ti čar Kon Tum ti să Tân Lập, kdriêk Kon Braih. Khua knŭk kna mtă kơ dŭm phŭn, dhar bruă, anôk bruă leh anăn cacrr Kon Tum lŏ dơ̆ng ktuê dlăng, ksiêm hriăm klei găl, hdră bi liê mđĭ kyar pui kmlă êran hŏng ai angĭn dưi hlue ngă, djŏ guôp hŏng Hdră kčah mbĭt mơ̆ng kluôm krĭng leh anăn kluôm ala, rơ̆ng klă mngač, djŏ klă, djŏ hdră kčah prăk bi liê, ba yua klei găl mđĭ kyar dŭm hdră bruă pui kmlă mkra mjing ti čar Kon Tum.

Khua knŭk kna ktuê dlăng anôk čuăl mkă tač êdeh phiơr Măng Đen; anôk mĭn tĭng pŏk ngă êlan dơ̆ng êran pral Kon Tum - Quảng Ngãi; êlan dơ̆ng mrô 24 mkŏ čar Kon Tum hŏng čar Quảng Ngãi, wăl mĭn tĭng ieô jak hdră bruă wăl anôk dôk, bruă mnia blei, hiu čhưn ênguê hlăm wă Ngŏ Dhŭng ti kdriêk Kon Plông, čar Kon Tum. Khua knŭk kna Phạm Minh Chính brei thâo, bruă mđĭ kyar wăl hiu čhưn ênguê ala čar Măng Đen djŏ guôp hŏng hdră tă mđĭ kyar mtah, kjăp, kluôm ti čar Kon Tum, mtă kơ čar Kon Tum bi hgŭm kjăp hŏng dŭm phŭn, dhar bruă ngă jăk hdră čuăl mkăn čiăng mđĭ lar jih klei găl, klei ktang leh anăn dưi mkhư̆ klei êdu kƀah mơ̆ng Măng Đen, boh nik amâo kruh ôh klei jăk dôk mâo, klei jăk siam ti Măng Đen.

Tlam mmăt hrue 19/8, tnao čuă ƀuôn dhar kreh hiu čhưn ênguê yang ƀuôn Kon Pring ti wăl krah Măng Đen, Khua knŭk kna Phạm Minh Chính lač, klei bi mguôpjing yuôm bhăn snăk mđĭ boh dưi kơ bruă cách mạng Việt Nam; anei jing leh knhuah gru yuôm bhăn mơ̆ng djuê ana pô, năng bi kriê pioh. Khua knŭk kna mtă kơ mnuih djuê ƀiă brei thâo bi đru hdơ̆ng găp mđĭ kyar klei hdĭp mda, hlue gưt hdră êlan mơ̆ng Đảng, knŭk kna, răng kriê klei êđăp ênang, amâo mâo lĕ hlăm klei phung soh mplư, kriê kjăp knhuah gru dhar kreh djuê ana pô... Ƀri mprăp kơ thŭn hriăm mrâo 2023-2024, nao čuă sang hră hđeh điêt Măng Đen ti wăl krah Măng Đen, kdriêk Kon Plông, Khua knŭk kna Phạm Minh Chính mtă kơ phung nai mâo nanao klei mĭn mrâo hlăm bruă mtô bi hriăm, mprăp jăk adŭ mtô hriăm. Ƀri wưng anei, khua knŭk kna mđup brei leh mnơ̆ng hŏng ênoh truh 1 êklai prăk pioh mkra mđĭ sang hră mơar, blei mprăp mnơ̆ng yua kơ sang hră./.