Aguah 9/10, Klei bi kƀĭn gưl dlông ASEAN tal 44,45 leh anăn klei bi kƀĭn djŏ tuôm mphŭn pŏk leh kdrưh kơăm ti Anôk bruă bi kƀĭn ala čar Lao, mâo klei hgŭm mơ̆ng Khua gĭt gai dŭm ala čar ASEAN, Timor-Leste hŏng lu phung bi ala ƀĭng hgŭm, êpul bruă dlông rŏng lăn leh anăn krĭng wăl. Khua knŭk kna Phạm Minh Chính ngă khua êpul bi ala gưl dlông Việt Nam nao hlăm knăm mphŭn pŏk. Blŭ hrăm hlăm knăm mphŭn pŏk, Khua gĭt gai Đảng, Khua lăn čar Lào Thoong-lun Xi-xu-lít mñă klă, hlăm wưng kơ anăp, ASEAN srăng bi kƀĭn jih jang dŭm ala čar Ngŏ Dhŭng Asi hŏng bruă Timor-Leste jing ala čar djăp ênŭm mơ̆ng ASEAN, bi mklă ktang klei lu jơr leh anăn klei găl prŏng mơ̆ng krĭng wăl, mbĭt anăn pŏk klei bi hgŭm mrâo hŏng dŭm ala čar hgŭm.

Hŏng akŏ “ASEAN: Mđĭ mkŏ leh anăn kjăp”, klei mđing, klei mĭn mbruă hlăm thŭn Khua gĭt gai Lào đru hlue ngă hdră kñăm mbĭt mkŏ mjing sa êpul êya ASEAN mkŏ hĭn leh anăn ktang hĭn. Leh knăm phŭn pŏk, Khua knŭk kna Phạm Minh Chính hŏng Khua gĭt gai dŭm ala čar ASEAN leh anăn Timor-Leste nao hlăm klei bi kƀĭn kluôm Klei bi kƀĭn gưl dlông ASEAN, bi trông kơ boh phŭn bi hgŭm hlăm ASEAN leh anăn ASEAN hŏng dŭm ala čar hgŭm