Khua knŭk kna Phạm Minh Chính gĭt gai leh mmông mă bruă hŏng Khua knŭk kna Campuchia leh anăn Khua knŭk kna Lào ƀri wưng nao čuă Malaysia, nao hlăm klei kƀĭn trông. Hlăm ai êwa pŏk mlar leh anăn bi hgŭm, 3 čô Khua knŭk kna bi trông kơ dŭm mta bruă bi mguôp mbĭt leh anăn dŭm boh klei hlăm alŭ wăl, tar rŏng lăn dôk bi mđing.

Tlâo čô Khua knŭk kna bi klă lu hdră êlan bi mguôp dua tĭng leh anăn plah wah 3 tĭng Việt Nam - Campuchia – Lào dưi leh anăn dôk đĭ kyar bi lar boh tŭ dưn, đru mguôp hlăm klei bi kjăp leh anăn ksul mbŭ kơ klei bi mguôp 3 ala čar. 3 čô Khua knŭk kna mñă ktang bruă kriê pioh leh anăn bi lar knhuah gru bi mguôp, bi đru hdơ̆ng pô plah wah Việt Nam - Campuchia – Lào ƀrư̆ hruê ƀrư̆ čiăng êdi leh anăn yuôm bhăn êdi, jing sa hlăm dŭm mta phŭn mtrŭt mđĭ klei bi mguôp kjăp plah wah 3 ala čar.