Hlăm klei kƀĭn, phung khua gĭt gai mñă klă dlăng yuôm bhăn klei mjĕ giăm plah wah 2 êpul êya yap mơ̆ng hruê mkŏ mjing klei mjĕ giăm hlăk thŭn 1990. ASEAN yap yuôm bhăn jih jang dŭm ala čar GCC dưi mŭt hlăm klei kuôl kă bi jăk leh anăn bi mguôp Ngŏ Dhŭng Asi, mbĭt anăn pah mni dŭm ala čar Araap hluh hlir (UAE) jing ƀĭng hgŭm blŭ hrăm mrô 1 hluê si mta bruă mơ̆ng ASEAN yap mơ̆ng thŭn 2022.

Mđing truh kơ êdei anăp, khua gĭt gai dŭm ala čar ASEAN leh anăn GCC bi tŭ ư čiăng bi trông jêñ jêñ, bi kjăp leh anăn bi kluôm dŭm hdră bi mguôp, mbĭt anăn mtrŭt mđĭ klei bi mguôp mtăp mđơr, hrăm mbĭt mâo boh tŭ, kñăm kơ klei bi mguôp hlăm bruă duh mkra, mnia mblei, duh bi liê, rơ̆ng kơ klei mkăp brei kjăp, bi mguôp hlăm êa ksĭ, bruă pui kmlă, mnơ̆ng ƀơ̆ng huă, bi mdrơ̆ng hŏng klei mlih yan adiê…Klei kƀĭn mâo klei bi klă mbĭt, čih hưn kơ dŭm boh tŭ dưn klei bi trông mơ̆ng khua gĭt gai leh anăn ba mdah dŭm hdră êlan mđĭ kyar hĭn klei mjĕ giăm ASEAN – GCC hlăm wưng kơ anăp.