Blŭ hlăm klei kƀĭn, Khua knŭk kna yap yuôm bhăn, pah mni dŭm boh tŭ dưn dưi mâo leh mơ̆ng bruă Mtô mjuăt bi hriăm hlăm thŭn hriăm 2022 – 2023, bi êdah ai tiê, bruă klam, klei gĭr mơ̆ng dhar bruă. Bi kơ hdră tă, bruă klam kñăm hlăm thŭn hriăm mrâo.

  Khua knŭk kna mtă kơ dŭm Phŭn, dhar bruă, alŭ wăl lŏ dơ̆ng ksiêm dlăng, mkra mlih, bi mbŏ dŭm hdră êlan, bi kluôm hdră bhiăn čiăng mlih mrâo bruă Mtô mjuăt bi hriăm, mđĭ boh tŭ dưn klei kriê dlăng mơ̆ng knŭk kna kơ bruă mtô bi hriăm. Boh nik Khua knŭk kna mñă, mkŏ mjing jăk bruă ksiêm wĭt 10 thŭn hluê ngă hdră mtrŭn mrô 29 mơ̆ng gưl dlông kơ briă mlih mrâo kluôm bruă mtô mjuăt bi hriăm, lŏ dơ̆ng ksiêm duah, bi kluôm, mđĭ kyar hdră mtô bi hriăm thŭn 2018 djŏ guôp hŏng mta kñăm, hnơ̆ng čuăn mâo leh. Mkŏ mjing, mkra mlih, bi mbŏ dŭm hdră êlan, hdră đru hŏng phung nai mtô, mđĭ hĭn bruă hâo hưn kơ dŭm hdră êlan, hdră mtrŭn mrâo hŏng bruă mtô mjuăt bi hriăm, mkŏ mjing klei sa ai mơ̆ng grăp gưl mnuih ƀuôn sang.