Hlăm hdră, Anôk bruă mkŏ mjing mđup brei klei pŭ mni kơ 190 anôk bruă duh mkra mâo mnơ̆ng dhơ̆ng djăp anăn knăl ala čar Việt Nam thŭn 2024. Blŭ hrăm hlăm anôk bi kƀĭn, Khua knŭk kna Phạm Minh Chính mttă, dŭm anôk bruă duh mkra djăp hnơ̆ng čuăn Anăn knăl ala čar leh anăn êpul êya anôk bruă duh mkra, mnia blei Việt Nam brei lŏ dơ̆ng mđĭ lar ênoh yuôm: Hnơ̆ng jăk - Mlih mrâo - Mbruă- Klei thâo ba anăp.

Hlăm wưng kơ anăp, Khua knŭk kna mtă kơ dŭm anôk bruă duh mkra brei ba yua klei găl đĭ kyar mtah leh anăn mđĭ kyar hơĭt kjăp; ba anăp hlăm  bruă duh mkra mtah; ba yua klei găl kơhưm anăn knăl ala čar, mbĭt anăn bi mguôp mkŏ mjing anăn knăl mnơ̆ng dhơ̆ng hŏng anăn knăl ala čar Việt Nam; gĭr tui duah, pŏk mlar anôk ba čhĭ ti ala tač êngao leh anăn hgŭm êlam hĭn hlăm hdră mkăp kluôm rŏng lăn.