Ƀri bi hdơr 94 thŭn hruê mkŏ mjing Êpul êdam êra  Hồ Chí Minh (26/3/1931 – 26/3/2025), mmăt 23/3, ti Hà Nội, Khua knŭk kna Phạm Minh Chính nao hjlăm Knăm mđup brei klei pah mni phung mda asei Việt Nam  êdah êdi thŭn 2024, hŏng akŏ “Bruă kalm kdrưh kơăm” kyua Êpul êdam êra CS Hồ Chí Minh, Keh đru kơ phung mda asei mbruă Việt Nam, Sang mđung rup Việt Nam bi hgŭm mkŏ mjing. Thŭn 2024, Anôk mkŏ mjing klei pah mni mâo mă leh 159 hră mơar mơ̆ng 55 anôk bruă kluôm ala.

Êpul gơ̆ng klei pah mni duah leh 10 čô mda asei Việt Nam êdah êdi leh anăn 8 čô mda asei Việt Nam mâo klei tŭ êdah êdi hlăm klei: Hriăm hră; Ksiêm hriăm kreh knhâo- mbruă; Mă bruă mkra mjing, mnia blei - mphŭn čô̆ kơ bruă; Lĭng kahan, klei êđăp ênang; mjuăt asei mlei, bruă ngă ala ƀuôn; Dhar kreh kdŏ mmuñ; Kriê dlăng hră mơar knŭk kna dưi pah mni. Khua knŭk kna Phạm Minh Chính mơak nao hlăm klei mpŭ mni phung mda asei  êdah êdi - phung êdei anăp kơ ala čar, hŏng bruă jing êpul ba anăp leh anăn ai tiê “Phung mda asei Việt Nam ktưn hưn, kjăp ktang tui hlue Đảng” ba lăn čar kjăp ktang mŭt hlăm ênuk mrâo. Khua knŭk kna mtă kơ phung êdam êra Việt Nam kƀĭn hlue ngă mtăp mđơr, mrâo mrang ala ƀuôn, mđĭ klei hdĭp mda mnuih ƀuôn sang, bi klă klơ̆ng hdră êlan mơ̆ng Đảng, Knŭk kna kơ klei êđăp ênang ala ƀuôn, boh nik mtăp mđơr kơ klei mtô bi hriăm, mdrao mgŭn hlăm grăp čar kwar, truh hŏng grăp êpul êya, grăp gŏ sang leh anăn grăp  čô mnuih, bohn nik krĭng čư̆ čhiăng, taih kbưi, knông lăn, plao ksĭ hŏng ai tiê “amâo lui klei pô ti tluôn”.