Bruă mkra êlan klei pui kmlă 500 kV aruăt mtlâo mâo Êpul grŭp pui kmlă Việt Nam jao kơ knơ̆ng bruă êlan klei pui kmlă ala čar jing pô duh bi liê, hŏng boh taih jih jang truh 519 km, 1.177 ƀĕ gơ̆ng, 513 kčŭn hyuă, găn nao djŏ hlăm 211 să/ƀuôn hgŭm mơ̆ng 43 kdriêk 09 boh čar hŏng ênoh duh bi liê jih jang êbeh 22.300 êklai prăk.

Blŭ hrăm ti anôk bi kƀĭn anei, Khua knŭk kna Phạm Minh Chính bi êdah klă bruă anei jing bruă yuôm bhăn mđĭ k’hưm bruă pui kmlă hlăm ala čar lehanăn hŏng ala tač êngao, bi klă klei kjăp mơ̆ng bruă pui kmlă. Khua knŭk kna mñă Đảng gĭt gai leh, knŭk kna mâo klei sa ai, bruă kƀĭn ala tŭ ư, mâo mnuih ƀuôn sang đru mbĭt, snăn knŏng bi trông ngă bruă, amâo mâo klei kdŭn mtluôn ôh. Kơ bruă čuăn thŭn 2024, Khua knŭk kna bi myuôm bruă pui kmlă bi leh jăk bruă čuăn, čang hmăng hlăm thŭn 2025 srăng bi leh bruă kčah kdlưn hĭn hŏng thŭn 2024 lehanăn amâo mâo lui kƀah pui yua ôh./.