Blŭ hrăm ti anôk mă bruă, Khua knŭk kna Phạm Minh Chính čih pioh, lehanăn bi mni kơ bruă Đảng, bruă sang čư̆ êa lĭng kahan lehanăn phung ƀuôn sang čar Hoà Bình mâo leh klei bi mguôp, gĭr mâo ba wĭt lu boh tŭ dưn hlăm klei duh mkra ala ƀuôn. Khua knŭk kna mtă kơ čar lŏ dơ̆ng kiă kriê, gĭt gai bi jăk bruă čuăl mkă lehanăn mđĭ kyar bruă nah gŭ, yap anei jing bruă kđi čar yuôm bhăn ngă tal êlâo hlăm čar, boh nik jing êlan klông.

Khua knŭk kna kčĕ kơ čar Hoà Bình mâo hdră êlan mđĭ kyar bi jih hnơ̆ng, ruh mgaih klei dleh dlan kơ ngăn prăk, bi mlih hdră êlan ngă hră mơar, mđĭ kyar jih jang mơ̆ng bruă dhar kreh, duh mkra, duh kơ klei hdĭp ai tiê lehanăn mnơ̆ng dhơ̆ng kơ mnuih ƀuôn sang, kriê kjăp bruă mđĭ bi lar knhuah gru dhar kreh./.