Hlăm mmông tŭ drông, Khua knŭk kna Phạm Minh Chính yap yuôm bhăn klei mjĕ giăm jăk siam plah wah Việt Nam leh anăn ƀang California hlăm anăn mâo ƀuôn prŏng Oakland, boh nik hlăm bruă duh mkra mnia mblei leh anăn bi mguôp kdrŭn ksĭ, mñă ktang ƀang California jing sa hlăm dŭm ƀĭng hgŭm alŭ wăl mrô 1 mơ̆ng Việt Nam hŏng giăm 100 knơ̆ng bruă hlăm ƀang duh bi liê kơ Việt Nam, knơ̆ng bruă Việt Nam ăt mâo êbeh 70 hdră duh bi liê kơ California.

Khua knŭk kna Phạm Minh Chính mñă kơ khua kiă kriê ƀuôn prŏng Oakland leh anăn phung khua êmua mrô 1 ƀang California lŏ dơ̆ng uêñ mĭn mđĭ kyar klei mjĕ giăm hŏng Việt Nam, boh nik hlăm bruă duh mkra mnia mblei, duh bi liê leh anăn mjĕ êrô mnuih ƀuôn sang, mâo bruă klam jing kdrông mkŏ plah wah Mi leh anăn Việt Nam ăt msĕ mơh plah wah dŭm knơ̆ng bruă dua lăn čar, đru mtrŭt mđĭ leh anăn bi kjăp hĭn klei mjĕ giăm Việt Nam – Mi.