Hlăm ai êwa bi hgŭm, đăo knang leh anăn pŏk mlar, Khua knŭk kna Phạm Minh Chính bi mni kơ Thẩm Hiểu Minh gưl tal êlâo hriê čuă ala čar Việt Nam hŏng bruă klam jing Khua bruă Đảng čar Hải Nam. Khua knŭk kna Phạm Minh Chính mñă klă klei yuôm bhăn hlăm klei bi mguôp hdră êlan kluôm ênŭm Việt Nam – China leh anăn mñă kơ 2 tĭng mtrŭt mđĭ klei bi mguôp hlăm djăp mta bruă, boh nik jing bruă mnia mblei hŏng hdră bi kna, pŏk phai klei duh bi liê, mđĭ klei mjĕ êrô mnuih ƀuôn sang, krŭ wĭt klei bi mguôp bruă hiu čhưn ênguê…

Bi kơ klei bi mguôp alŭ wăl, Khua knŭk kna Phạm Minh Chính mñă kơ čar Hải Nam mđĭ hĭn klei bi trông, bi mguôp hŏng dŭm phŭn, dhar bruă, alŭ wăl Việt Nam, hlăm anăn mâo ƀuôn prŏng Hồ Chí Minh leh anăn čar Quảng Ninh, mtrŭt mđĭ klei bi mguôp mâo boh tŭ mbĭt kơ bruă hiu chưn ênguê, mkŏ êlan klông, mtô bi hriăm, bruă mdrao mgŭn, mjĕ êrô dhar kreh, bi mguôp mdrơ̆ng hŏng klei mlih yan adiê, tui duah đru dŏng ti êa ksĭ, dôk dơ̆ng ƀơ̆ng huă hŏng phung mă kan hdang, đru rơ̆ng klei êđăp ênang, hơĭt kjăp leh anăn bi mguôp hlăm êa ksĭ.