Aguah 29/12, Khua knŭk kna Phạm Minh Chính gĭt gai klei bi kƀĭn Anôk bruă gĭt gai mơ̆ng Knŭk kna kơ klei “ksiêm wĭt bruă hlue ngă  Hdră mtrŭn mrô 18-NQ/TW”.  Hlue si klei hưn mdah, bruă dăp êpul mă bruă kđi čar mâo dŭm phŭn, dhar bruă, anôk bruă knŭk kna pŏk ngă mjêč, truh ară anei klă klơ̆ng bi lih hdră bruă. Mĭn tĭng êpul mă bruă Knŭk kna srăng dưi bi hrŏ mơ̆ng 30 adôk 21 anôk phŭn mâo: 13 Phŭn bruă, 4 anôk bruă bi knar hŏng phŭn bruă leh anăn 4 anôk bruă hlăm Knŭk kna.

Anôk bruă gĭt gai kƀĭn ktuê dlăng bruă knuă, hlăm anăn kƀĭn bi trông kơ bruă mjưh ruê̆ bruă klam mơ̆ng Anôk dlăng bruă đảng Knŭk kna leh anăn mkŏ mjing êpul bruă Đảng Knŭk kna hlăm Gưl dlông. Klah čŭn klei bi kƀĭn, Khua knŭk kna Phạm Minh Chính brei lŏ dơ̆ng ksiêm dlăng, mkra mđĭ, mbŏ hlue si boh klei mâo, hlăm klei dăp brei khuăt, ktang, ngă bruă tŭ dưn, mđĭ hnơ̆ng thâo phung mă bruă knŭk kna. Boh nik, bruă dăp phung mă bruă knŭk kna brei bi hrŏ klei dôk krah wah, ƀiădah amâo ngă mtŭk mtŭl, amâo lui ôh bruă klam, klei dưi.