Khua lăn čar hđăp Trần Đức Lương k’kiêng hruê 05/05/1937 ti să Phổ Khánh, kdriêk Đức Phổ, čar Quãng Ngãi. Ñu nao hgŭm hlăm bruă cách mjang mlan 02/1955. Mơ̆ng mlan 02/1955 truh mlan 9/1955 ñu nao ti kwar Dưr, hriăm hlăm bruă ksiêm duah kơ lăn. Leh anăn ñu mă bruă hlăm Êpul ksiêm dlăng kơ lăn mrô 20 hŏng bruă klam jing pô mă bruă hdră êlan, khua êpul ksiêm dlăng kơ lăn truh kơ k’iăng khua êpul hdră êlan. Leh wưng hriăm thơ̆ng ti sang hră Mỏ - Địa chất, dăl hlăm 20 thŭn tal êlâo mơ̆ng bruă pô, ñu nao ti dŭm krĭng čư̆ dliê, ksiêm duah kơ lăn, đru mguôp yuôm bhăn hlăm bruă mkŏ mjing klei čih pioh ngăn dŏ lăn čar đru mđĭ kyar bruă duh mkra – ala ƀuôn. Ñu dưi jao lu bruă klam: K’iăng khua anôk bruă hră kak lăn, Khua anôk bruă ksiêm duah kơ lăn, k’iăng khua kiă kriê leh anăn ngă khua dhar bruă kreh knhâo leh anăn hdră êlan mơ̆ng Bruă kƀĭn ala.

Phung mă bruă mƀt mơ̆ng Trần Đức Lương hlăm bruă ksiêm kơ lăn ăt djă pioh nanao dŭm klei tuôm găn kơ sa čô dĭng kna, pô mă bruă mbĭt, khua gĭt gai bi hmô, jih ai tiê. Ênguôt kyua klei đuê̆ nao mơ̆ng Khua lăn čar hđăp Trần Đức Lương, nai prŏng Nguyễn Thành Vạn, khua kiă kriê hđăp anôk bruă hră kak lăn leh anăn mnơ̆ng gŭ lăn Việt Nam (Phŭn bruă lŏ hma leh anăn wăl hdĭp mda) brei thâo:

 “Hŏng kâo Khua lăn čar hđăp Trần Đức Lương pô êlâo dih hmei kreh iêo yŏng Trần Đức Lương. Ñu jing sa čô ayŏng leh anăn jing sa čô nai. Ñu čŏng hriăm leh anăn mâo hdră nao jĕ dŭm boh klei mơ̆ng lăn hŏng ală dlăng kreh knhâo. Ñu mă bruă klă anăp hŏng phung thơ̆ng kơ bruă mơ̆ng Liên Xô, ñu čŏng hriăm leh anăn thâo blŭ klei Russia, ñu bi êdah dŭm boh klei hŏng klei Russia hŏng êpul phung thơ̆ng kơ bruă mơ̆ng Russia leh anăn phung anăn ăt bi kngar êdi. Dŭm boh klei kơ lăn êdei anei hmei kiă kriê, ñu mâo nanao klei bi mguôp, tă hdră yuôm bhăn. Ñu ktrâo atăt leh anăn mtô mjuăt kâo lu sơnăk leh anăn mâo dưi hriăm lu sơnăk mơ̆ng knuih kniêng ayŏng Trần Đức Lương.

Mơ̆ng thŭn 1987 truh mlan 8/1992, Trần Đức Lương dưi tiŏ nao păn ngă K’iăng khua êpul gơ̆ng Khua phŭn bruă ( ară anei jing k’iăng Khua knŭk kna ), mbĭt anăn jing pô bi ala mơ̆ng Việt Nam hlăm Êpul gơ̆ng bi đru bruă duh mkra. Mơ̆ng mlan 9/1992, ñu păn ngă k’iăng Khua knŭk kna truh thŭn 1997. 10 thŭn păn ngă k’iăng Khua knŭk kna , ăt jing wưng lăn čar hluê ngă ktang phĭt hdră êlan mlih mrâo mơ̆ng Đảng, bi mlih mơ̆ng bruă duh mkra kƀĭn jing bruă duh mkra anôk mnia mblei tă hdră yang ƀuôn ngă phŭn hŏng lu klei dleh dlan. Hlăm boh klei anei, asei k’iăng Khua knŭk kna Trần Đức Lương mbĭt hŏng êpul bruă Knŭk Kna klam bruă ktrŏ hlăm wưng mrâo mlih mrâo čiăng ba lăn čar ƀrư̆ ƀrư̆ tlaih mơ̆ng klei dleh dlan, đru mkŏ mjing dŭm boh tŭ dưn hlăm klei mlih mrâo.

Hdơr kơ klei hdĭp leh anăn bruă mă mơ̆ng Khua lăn čar hđăp Trần Đức Lương duh myơr kơ lăn čar, hlăm anăn mâo wưng ñu ngă k’iăng Khua knŭk kna, k’iăng nai prŏng, nao prĭn Bùi Thị An, pô bi ala Bruă kƀĭn ala gưl 12, Khua anôk bruă ngăn dŏ, Wăl hdĭp mda leh anăn mđĭ kyar yang ƀuon, k’iăng khua êpul hgŭm klei kdreh knhâo leh anăn hdră mnêč Hà Nội bi êdah:

 “Hlăm wưng Trần Đức Lương ngă k’iăng Khua knŭk kna, lăn čar dôk dleh dlan. Ƀiădah ñu mâo klei gĭr, gĭr mbĭt hŏng Knŭk Kna, asei ñu pô gĭr, hŏng ai dưi mơ̆ng lăn čar  drei leh anăn diñu ksiêm dlăng, mă klei hriăm mơ̆ng ala tač êngao čiăng ba lăn čar tlaih mơ̆ng klei dleh dlan, ƀrư̆ ƀrư̆ kpưn đĭ kơ bruă duh mkra, bruă kđi čar hơĭt, kơhưm lăn čar dưi mđĭ. Hlăm năn mâo klei đru mguôp mơ̆ng Trần Đức Lương hŏng bruă klam jing k’iăng Khua knŭk kna, klam bruă tuh tia dleh dlan, ƀiădah dưi mđĭ găn hgao.”

Hlăm dua wưng păn bruă Khua lăn čar (1997 – 2006), Trần Đức Lương mâo dŭm klei đru mguôp prŏng hlăm bruă knuă leh anăn bruă hŏñg  tač êngao, đru rơ̆ng kjăp klei hơĭt bruă kđi čar, mtrŭt mđĭ klei đĭ kyar bruă duh mkra aleh anăn mđĭ kơhưm Việt Nam hlăm tar rŏng lăn. Trần Đức Lương uêñ mĭn kơ bruă mkŏ mjing Knŭk Kna yang ƀuôn ngă phŭn, mtrŭt mđĭ klei mlih hră mơar Knŭk Kna, mđĭ hĭn bruă klam hdră bhiăn lăn čar hlăm klei hdĭp yang ƀuôn. Hlăm wưng anei, dŭm klei mlih kơ klei kiă kriê, êpul mă bruă leh anăn hră mơar Knŭk Kna ƀrư̆ ƀrư̆ dưi ngw, mkŏ mjing tur knơ̆ng kơ klei bi mrâo mrang leh anăn ñŭ kma. Pô čih klei mrâo Hà Đăng  - khua kiă kriê hđăp êpul ƀruă klei mĭn – dhar kreh gưl dlông bi êdah dŭm gru kruăk knăl mơ̆ng Khua lăn čar hđăp Trần Đức Lương:

 “Trần Đức Lương ngă Khua lăn čar ăt mâo lu grŭ kruăk. Ƀiădah mmông anăn hdră mkra mjing pô dôk đĭ, ƀiădah lŏ tuôm hŏng lu klei dleh dlan, ñu mâo klei uêñ mĭn kơ klei mđĭ kyar bruă duh mkra ala ƀuôn. Mđĭ kyar hdră êlan pô. Trần Đức Lương ăt jing sa čô Khua lăn čar mâo klei khăp hŏng mnuih ƀuôn sang, ayŏng adei leh anăn knuă druh ăt msĕ mơh. Dŭm klei ñu ngă dưi čih yap hlăm wưng ñu mgaih msir bruă knuă mơ̆ng Khua lăn čar”.

Amâo djŏ knŏng jing sa čô khua gĭt gai mâo kơhưm, Khua lăn čar hđăp Trần Đức Lương lŏ jing sa čô đảng viên siă suôr, jih klei hdĭp gĭr ktưn kyua klei mĭn cộng sản. Mơ̆ng thŭn 1959, ñu mŭt hlăm êpul bruă Đảng, găn 65 thŭn mjuăt hriăm, duh myơr amâo mâo mdei. Hlăm djăp bruă păn, ñu bi êdah nanao ai tiê nao êlâo, bi hmô, mtrŭn pô leh anăn jĕ giăm hŏng mnuih ƀuôn sang. Hŏng dŭm klei đru mguôp kơ lăn čar, Trần Đức Lương mâo leh Đảng leh anăn Knŭk Kna mđup brei lu mêđai yuôm bhăn msĕ si mêđai mtŭ êa mah, mêđai 65 thŭn Đảng leh anăn lu mêđai, hnư mnơ̆ng, anăn knăl yuôm bhăn mơ̆ng Việt Nam leh anăn tar rŏng lăn.

Khua lăn čar hđăp Trần Đức Lương djiê. Đảng, Knŭk Kna leh anăn mnuih ƀuôn sang Việt Nam luč sa čô khua gĭt gai mâo kơhưm, jih ai tiê leh anăn mdưm boh tŭ dưn mơ̆ng lăn čar leh anăn mnuih ƀuôn sang jing tal êlâo hĭn. Klei hdĭp leh anăn bruă knuă ñu jing gru mngač kơ dŭm gưl phung knuă druh, đảng viên hluê ngă./.