Blŭ hrăm ti anôk bi tuôm, Khua lăn čar Lương Cường bi mni kơ dŭm klei blŭ hŏng ai tiê rŭ mdơ̆ng, bi êdah klei đua klam, jih ai tiê hŏng hdră mđĭ kyar mơ̆ng ala čar. Dŭm klei blŭ bi êdah klei mơak ti anăp hdră mtrŭn mrâo mơ̆ng Gưl dlông, klei ngă bruă kjăp ktang, mđrăm mbĭt mơ̆ng jih anôk bruă kđi čar, êpul êya anôk bruă duh mkra lehanăn jih jang mnuih ƀuôn sang, đru mguôp dưi mâo dŭm boh tŭ dưn yuôm bhăn hlăm hdră duh mkra, ala ƀuôn, lĭng kahan, răng mgang klei êđăp ênang ti alŭ wăl. Mbĭt anăn, mnuih ƀuôn sang ăt ba mdah lu bruă dôk gun kpăk dôk mâo djŏ tuôm kơ klei hdĭp mnuih ƀuôn sang brei pral ruh mtlaih lehanăn msir mghaih.

Aguah, ti Wăl knhuah gru hƀuê ênuk ala čar Ngã Ba Giồng (să Xuân Thới Thượng, kdriêk Hóc Môn), Khua lăn čar Lương Cường nao dưm leh kwang mnga, čuh brui mngưi, lui mnĭt mmông bi hdơr kơ klei đru mguôp prŏng prĭn mơ̆ng Khua gĭt gai Hồ Chí Minh lehanăn phung khua hđăp kiă kriê Đảng gưl dlông, phung mă bruă cách mạng, phung kahan jhŏng ktang djiê êngiă, mnuih ƀuôn sang săn leh asei kyua klei êđăp ênang, hnŭk êngiê mơ̆ng djuê ana, kyua klei yâo mơak mơ̆ng mnuih ƀuôn sang.