Tŭ ư asăp jak iêu mơ̆ng Khua lăn čar Lương Cường lehanăn Mô̆, Mtao ala čar Belgium Philippe lehanăn Mô̆ mtao hriê čhưn leh ti Việt Nam mơ̆ng hruê  31/3 - 04/4/2025. Aguah 1/4, leh knăm drông gưl Knŭk kna dưi mkŏ mjing ti Adŭ bruă Khua lăn čar, Khua lăn čar Lương Cường lehanăn Mtao Belgium Philippe mâo leh klei bi tuôm.

Ti knăm anei, Khua lăn čar Lương Cường mñă klă, Việt Nam dlăng myuôm lehanăn čang hmăng mđĭ hĭn klei bi hgŭm hlăm lu mta bruă hŏng Belgium, ala čar mâo bruă klam lehanăn klei blŭ yuôm bhăn hlăm EU; bi êdah klei mpŭ lehanăn sa ai mơ̆ng mnuih ƀuôn sang Belgium kơ Việt Nam hlăm hdră kdơ̆ng mblah suă wĭt klei hnŭk êngiê êlâo adih, ăt msĕ mơh klei khăp jăk siam lehanăn klei đru mguôp mơ̆ng Mtao, Mô̆ mtao ala čar Belgium kơ lăn čar, mnuih ƀuôn sang Việt Nam lehanăn klei bi mjĕ mơ̆ng dua ala čar hlăm wưng êgao. Dua khua kiă kriê bi trông leh kơ hdră bi hgŭm prŏng hĭn plah wah dua ala čar kñăm ba klei bi mjĕ jăk siam Việt Nam – Belgium nao mŭt êlam hĭn, klă sĭt, tŭ dưn hĭn, mâo klei bi tuôm lehanăn bi trông dŭm gưl, boh nik gưl dlông, hlăm bruă Đảng, Knŭk kna, Anôk bruă kƀĭn ala; lŏ dơ̆ng pŏk ngă tŭ dưn klei bhiăn bi hgŭm dua nah dôk mâo lehanăn ksiêm dlăng čih mkra klei bhiăn bi hgŭm mrâo čiăng bi êlam hĭn hdră bi hgŭm plah wah dua ala čar./.