Hlăm ai êwa bi hgŭm leh anăn đăo knang, dua čô khua gĭt gai bi hưn kơ boh sĭt bruă duh mkra ala ƀuôn grăp lăn čar, bi klă kơ dŭm klei đĭ kyar hlăm klei mjĕ giăm dua tĭng hlăm wưng êgao, mbĭt anăn bi trông leh anăn bi sa ai kơ dŭm hdră êlan bi mguôp plah wah dua ala čar hlăm wưng kơ anăp. Khua lăn čar Lương Cường leh anăn Khua mil čhil Prăng bi tŭ ư mtrŭt mđĭ klei mnia mblei duh bi liê, hluê ngă tŭ dưn Klei kuôl kă mnia mblei êngiê Việt Nam – Eu.

Prăng srăng mtrŭt mjhar hnưm bi klă hdră êlan rơ̆ng kơ klei duh bi liê EU – Việt Nam, mtrŭt mjhar dhar bruă Ơrôp hnưm lăm lui hră kñĭ IUU hŏng kan hdang Việt Nam leh anăn mkŏ mjing klei găl čiăng kơ Việt Nam lŏ ba čhĭ kan hdang kơ Prăng leh anăn EU. Dua čô khua gĭt gai bi tŭ ư lŏ dơ̆ng mđĭ hĭn leh anăn mtrŭt mjhar klei bi mguôp hlăm dŭm bruă knhuah gru msĕ si Sang hră mơar, bruă mdrao mgŭn leh anăn hdră bhiăn ăt msĕ mơh hlăm bruă dhar kreh – hiu čhưn ênguê, bruă lŏ hma leh anăn  bi mdrơ̆ng hŏng klei truh yan adiê. Leh klei blŭ hrăm, Khua lăn čar Lương Cường leh anăn Khua mil čhil Prăng ktuê dlăng knăm jao dŭm hdră mơar bi mguôp hlăm lu mta bruă msĕ si: bruă lĭng kahan, klei kreh knhâo mrâo mrang, pui kmlă hạt nhân, hdră bhiăn, êlan klông dŭm diăng, êngĭt adiê, bruă lŏ hma leh anăn wăl hdĭp mda, bruă mdrao mgŭn…/.