Hlăm hdră nao čhưn ti Chile, ti ƀuôn prŏng phŭn Santiago de Chile, Khua lăn čar Lương Cường lehanăn Êpul bi ala gưl dlông Việt Nam nao čuă, blŭ hrăm hŏng phung knuă druh, mnuih mă bruă ti Anôk bruă bi la mbĭt hŏng êpul êya mnuih Việt Nam dôk hdĭp, mă bruă lehanăn hriăm hră ti Chile.

Ti knăm anei, Pô bi ala Việt Nm ti Chile hưn leh hŏng Khua lăn čar Lương Cường kơ hdră mă bruă mơ̆ng Anôk bruă bi ala lehanăn êpul êya mnuih Việt Nam dôk hdĭp, mă bruă ti Chile. Pô bi ala mñă klă, hŏng klei bi mjĕ jăk siam mơ̆ng đưm, dưi ksŭl mbŭ mơ̆ng phung khua kiă kriê dŭm gưl lehanăn mnuih ƀuôn sang dua ala čar, bruă klam phŭn mơ̆ng Anôk bruă bi ala Việt Nam ti Chile jing krơ̆ng kjăp klei bi mjĕ hlăm bruă kđi čar mơ̆ng dua ala čar. Knuă druh, mnuih mă bruă ti Anôk bruă bi ala lehanăn êpul êya mnuih Việt Nam ti Chile đăo knang kjăp hlăm hdră êlan mtrŭn mơ̆ng Đảng, hdră bhiăn mơ̆ng Knŭk kna lehanăn kơhưm ƀrư̆ hruê ƀrư̆ đĭ mơ̆ng ala čar mbĭt hŏng klei đăo knang kjăp hlăm ênuk gưl kpưn đĭ mơ̆ng djuê ana.

Hlăm hdră nao čhưn ti Chile, Khua lăn čar Lương Cường bi tuôm hŏng Khua kiă kriê Đảng cộng sản Chile Lautaro Carmona Soto; nao cuă lehanăn bi tuôm sŭk suôr hŏng êpul mă bruă ti Knơ̆ng ksiêm hriăm bruă dhar kreh Chile – Việt Nam./.