– Hlăm hruê mă bruă tal êlâo mơ̆ng klei bi kƀĭn tal 8, Anôk bruă kƀĭn ala gưl 15, tlam mbruê 21/10, Anôk bruă kƀĭn ala ruah leh Khua lăn čar Việt Nam yang ƀuôn ngă phŭn wưng thŭn 2021-2026. Boh tŭ, Khua hlăm Phŭn bruă kđi čar, Khua hlăm Anôk kriê dlăng bruă Đảng gưl dlông Lương Cường mâo Anôk bruă kƀĭn ala ruah ngă Khua lăn čar Việt Nam yang ƀuôn ngă phŭn wưng thŭn 2021-2026. Hdră mtrŭn ruah Lương Cường păn ngă Khua lăn čar mâo phung bi ala Anôk bruă kƀĭn ala tŭ ư. Ti gŭ hla čhĭm gru hrah mtŭ kñĭ, Khua lăn čar Việt Nam yang ƀuôn ngă phŭn mrâo wưng thŭn 2021 – 2026 Lương Cường ƀuăn rơ̆ng “Sĭt suôr hŏng Lăn čar, hŏng mnuih ƀuôn sang, hŏng Hdră bhiăn phŭn ala čar Việt Nam yang ƀuôn ngă phŭn; gĭr bi leh jih bruă klam mâo Đảng, Knŭk kna lehanăn mnuih ƀuôn sang kčah jao”.

Lương Cường kkiêng thŭn 15/8/1957; Ƀuôn sang: Să Dữu Lâu, ƀuôn prŏng Việt Trì, čar Phú Thọ. Khua lăn čar Lương Cường tuôm păn ngă dŭm bruă: Khua bruă Đảng kahan krĭng 2, Khua bruă Đảng kahan krĭng 3. Mlan 1/2016, ti Klei bi kƀĭn phung bi ala kluôm ala čar tal XIII mơ̆ng Đảng, Lương Cường dưi ruah ngă Khua hlăm Anôk bruă Đảng gưl dlông. Klei bi kƀĭn tal 1 Anôk kriê dlăng bruă Đảng gưl dlông ruah leh Lương Cường mŭt hlăm Anôk bruă Đảng gưl dlông tal XII. Mlan 4/2016, Lương Cường mâo Phŭn bruă kđi čar ruah ngă Khua knơ̆ng bruă kđi čar, Lĭng kahan yang ƀuôn Việt Nam. Mlan 1/2019, Lương Cường dưi mđĭ grat Đaị tướng. Ti Anôk bi kƀĭn kluôm ala tal XIII mơ̆ng Đảng, Lương Cường dưi ruah ngă khua hlăm Anôk bruă Đảng gưl dlông. Ti Klei bi kƀĭn tal 1 Anôk kriê dlăng bruă Đảng gưl dlông, Lương Cường dưi ruah ngă khua Hlăm phŭn bruă kđi čar tal XIII. Mlan 5/2024, Phŭn bruă kđi čar bi mklă ruah Đại tướng Lương Cường, Khua hlăm Phŭn bruă kđi čar, Khua knơ̆ng bruă lĭng kahan yang ƀuôn Việt Nam nao hgŭm ngă Khua hlăm Anôk bruă Đảng gưl dlông./.