Bi ala kơ khua gĭt gai Đảng, knŭk kna, Khua lăn čar Nguyễn Xuân Phúc mơĭt klei êmuh čuă, klei hơêč hmưi jăk siam truh kơ phung bi ala, phung khua gĭt gai hđăp gưl dlông ti alŭ wăl krĭng kwar Krah, krĭng lăn bŏ hŏng knhuah gru bruă krŭ kdơ̆ng, mâo lu klei bi mguôp hlăm bruă mkŏ mjing leh anăn răng mgang ala čar. Khua lăn čar brei thâo, thŭn leh êgao, ti gŭ klei gĭt gai mơ̆ng Đảng, klei čŏng pô, hur har, hrăm mbĭt, bi mguôp mơ̆ng dŭm anôk bruă yuôm bhăn mơ̆ng bruă kđĭ čar, kluôm ala dưi mâo lu boh tŭ dưn yuôm bhăn hlăm djăp mta bruă duh mkra ala ƀuôn, rơ̆ng klei êđăp ênang leh anăn bruă hŏng tač êngao.

Hlăm anăn, bruă duh mkra đĭ kyar krang, mâo 8,02%. Bruă duh mkra hnơ̆ng prŏng hơĭt kjăp, dưi rơ̆ng klei bi kna. Hŏng hdră amâo mâo lui kơ sa čô ti tluôn, bruă bi hơĭt klei hdĭp yang ƀuôn dưi rơ̆ng kjăp, đru kơ phung yua mnuih mă bruă leh anăn êbeh 68 êklăk gưl čô mnuih mă bruă hŏng kluôm ênoh êbeh 104 êbâo êklai prăk.