Hlăm mmông bi tuôm, bi ala kơ khua gĭt gai Đảng, knŭk kna, Khua lăn čar Võ Văn Thưởng bi êdah klei hơ̆k mơak bi tuôm hŏng phung bi ala phung mâo bruă tŭ dưn čar Trà Vinh, bi êdah klei hdơr knga kơ phung nao êlâo mâo klei duh myơr, săn asei kyua klei êngiê djuê ana, hluh hlir lăn čar.

Mñă klă Đảng, knŭk kna mâo nanao klei gĭr uêñ mĭn, kriê dlăng phung mâo bruă tŭ dưn, Khua lăn čar mtă kơ dŭm gưl, dhar bruă, bruă Đảng, bruă sang čư êa čar Trà Vinh lŏ dơ̆ng hluê ngă jăk, tŭ dưn dŭm hdră êlan mơ̆ng knŭk kna hŏng phung mâo bruă tŭ dưn, lŏ dơ̆ng ksiêm dlăng, amâo mâo lui kơ sa čô mâo ai đru bruă krŭ kdơ̆ng ka mâo klei đru mơ̆ng knŭk kna, ƀiădah kăn brei mâo klei đru kơ amâo mâo djŏ pô. Khua lăn čar mñă ktang, bruă hluê ngă dŭm hdră êlan đru kơ phung mâo bruă tŭ dưn ti čar Trà Vinh ăt jing sa hdră êlan kñăm mđĭ klei bi mguôp djuê ana, boh nik Trà Vinh mâo lu mnuih ƀuôn sang dŭm djuê ana săn asei kơ klei krŭ kdơ̆ng.