Khua bruă kƀĭn ala nah dlông Italia bi mni kơ gưl nao čuă mơ̆ng Khua lăn čar Võ Văn Thưởng leh anăn Êpul bi ala gưl dlông Việt Nam, mñă ktang anei jing klei bi trông êpul gưl khua gĭt gai tal êlâo plah wah 2 ala čar hlăm wang 7 thŭn êgao, mkŏ mjing tur knơ̆ng yuôm bhăn hlăm klei mjĕ giăm bi mguôp 2 tĭng. Dua tĭng bi tŭ ư bi mguôp kjăp hĭn, sa ai hdơ̆ng pô hlăm dŭm klei kƀĭn bruă kƀĭn ala msĕ si Êpul hgŭm bruă kƀĭn ala tar rŏng lăn (IPU) čiăng đru mguôp kơ klei êđăp ênang, bi mguôp leh anăn mđĭ kyar ti alŭ wăl leh anăn tar rŏng lăn. Hlăm klei bi tuôm hŏng Khua kiă kriê bruă kƀĭn ala nah gŭ Italia, Khua lăn čar Võ Văn Thưởng mñă brei mtrŭt mđĭ klei bi mguôp plah wah dŭm anôk bruă čih mkra hdră bhiăn 2 ala čar, hlăm anăn mâo bruă mđĭ hĭn klei bi trông êpul, sa ai hŏng bruă klam mơ̆ng Việt Nam jing kdrông mkŏ mtrŭt mđĭ klei mjĕ giăm plah wah Bruă kƀĭn ala Italia leh anăn Êpul hgŭm bruă kƀĭn ala ASEAN. Khua kiă kriê bruă kƀĭn ala nah gŭ Italia brei thâo, bruă kƀĭn nah gŭ Italia bi klă klei kuôl kă rơ̆ng kơ klei duh bi liê Việt Nam – EU (EVIPA) ƀri wưng nao čuă mơ̆ng Khua lăn čar srăng đru mkŏ mjing klei găl kơ klei bi mguôp duh bi liê plah wah 2 tĭng.

Ăt hlăm klei hiu čhưn anăn, Khua lăn čar Võ Văn Thưởng mâo leh klei bi tuôm hŏng khua kiă kriê ƀuôn prŏng Roma Roberto Gualtieri. Khua lăn čar bi êdah klei mơak mâo nao čhưn truh kơ Roma, ƀuôn prŏng dhar kreh, hƀuê ênuk, bŏ hŏng klei siam, lehanăn bruă rŭ mdơ̆ng jăk êdi jing anôk hing ang mrô sa tar rŏng lăn; čang hmăng kơ khua kiă kriê ƀuôn prŏng Roma lehanăn êpul khua kiă kriê ƀuôn prŏng mâo klei hgŭm lu hĭn plah wah krĭng Lazio lehanăn Roma hŏng Hà Nội, lŏ mtrŭn agha êlam hĭn hlăm djăp mta bruă plah wah dua ala čar. Khua lăn čar čang hmăng kơ klei bi hgŭm dua nah srăng hyuă kjăp hĭn kơ bruă dhar kreh, kơ klei bi mjĕ êrô, bi hưn mthâo dhar kreh grăp ala čar, grăp boh ƀuôn prŏng, mơ̆ng anăn mđĭ hĭn klei thâo bi mguôp mnuih ƀuôn sang dua nah, hlăm klei bi đru./.