Ti knăm anei, dua tĭng bi trông leh kơ hdră msir čiăng pŏk ngă Klei kuôl kă mŏng phung khua kiă kriê Đảng, Knŭk kna, lŏ dŏng mtrŭt mđĭ lehanăn bi êlam hĭn klei bi mjĕ hgŭm bruă hlăm djăp mta ra klei. Khua lăn čar mtă hlăm wưng ti anăp, dua tĭng lŏ dơ̆ng bi hgŭm kjăp, mprăp kơ dŭm hdră bi trông gưl dlông, mđĭ klei bi hgŭm plah wah dŭm Phŭn, dhar bruă, alŭ wăl dua ala čar, mtrŭt mđĭ hdră bi hgŭm bruă duh mkra – mnia mblei, mtă kơ China lŏ dơ̆ng mjing klei găl blei dŭm mta mnơ̆ng lŏ hma Việt Nam, mđĭ hdră duh bi liê ti Việt Nam hŏng dŭm hdră bruă prŏng, bi êdah kơ klei đĭ kyar mơ̆ng China.

Ti Bắc Kinh, China, Khua lăn čar Võ Văn Thưởng drông čhưn leh khua kiă kriê Knơ̆ng bruă duh bi liê bruă mkŏ mkra ASI (AIIB) Kim Lập Quân. Hlăm mmông drông čhưn, Khua lăn čar yap yuôm bhăn AIIB amâo mâo mdei pŏk mlar dŭm mta bruă, mâo lu boh tŭ dưn yuôm bhăn leh anăn ƀrư̆ hruê ƀrư̆ mđĭ bruă klam mơ̆ng sa knơ̆ng prăk đĭ kyar lu tĭng, hrăm mbĭt hŏng dŭm êpul êya msĕ si WB, ADB…mkăp brei ngăn prăk bi djăp ênŭm hnơ̆ng čuăn mđĭ kyar bruă mkŏ mkra ti Asi, boh nik jing dŭm ala čar dôk đĭ kyar, hlăm wưng kơ anăp, Khua lăn čar mñă kơ AIIB bi mguôp đru kơ phung hgŭm mâo klei čiăng lĭng čan leh anăn kdrăp mrâo, lŏ dơ̆ng mtrŭt mđĭ bruă mkŏ mkra ti Asi, hlăm anăn mđĭ kơ klei mlih mtah, mđĭ ai dưi bi mdrơ̆ng hŏng klei mlih yan adiê.