Hlăm mmông tŭ drông, Dua čô khua gĭt gai bi tŭ ư, bruă dua ala čar mkŏ mjing knăm bi hdơr hƀuê ênuk 50 thŭn gưl hriê čuă mơ̆ng khua gĭt gai Cuba Fidel Castro truh kơ krĭng sua wĭt klei êngiê krĭng kwar Dhŭng Việt Nam jing bi êdah klei mpŭ hŏng dŭm ngăn dưn mơ̆ng khua gĭt gai Hồ Chí Minh, khua gĭt gai Cuba Fidel Castro leh anăn lu gưl khua gĭt gai, mnuih ƀuôn sang dua ala čar mâo leh hlăm klei mjĕ giăm Việt Nam – Cuba.

Hŏng klei mjĕ giăm ayŏng adei, Khua lăn čar Võ Văn Thưởng mñă kơ dua tĭng lŏ dơ̆ng bi mguôp kjăp čiăng mđĭ hĭn klei bi hgŭm hŏng bruă hluê ngă dŭm klei bi trông gưl dlông, dŭm hdră bi mguôp dôk mâo, bi mlar dŭm hdră blŭ hrăm leh anăn bi mguôp plah wah dua tĭng.