Ti anôk bi tuôm hŏng khua kiă kriê êpul grŭp Huawei Lương Hoa, Khua lăn čar mñă, bruă bi mlih mrô, lehanăn mđĭ kyar bruă duh mkra mrô dlông rŏng lăn jing pral êdi. Việt Nam dlăng yuôm lehanăn tui tiŏ bruă anei. Việt Nam iêo mthưr klei bi hgŭm mơ̆ng dŭm tĭng mơ̆ng gưl knŭk kna truh kơ êngao knŭk kna, klei bi hgŭm đru mđĭ kyar bruă duh mkra mrô.

Drông Lý Tự Học -  Khua kiă kriê êpul grŭp Trung Hưng (ZTE), khua lăn čar Võ Văn Thưởng bi mni kơ boh tŭ dưn mơ̆ng ZTE lehanăn klei hgŭm duh mkra mnia mblei ZTE ti Việt Nam, jing pô hgŭm prŏng bruă dăng kông ti Việt Nam.  Khua lăn čar čang hmăng phung duh bi liê mơ̆ng phung duh mkra China mă bruă tŭ jing ti Việt Nam hŏng ênoh jih jang êbeh 26 êklai đô la. Hlăm anăn, ZTE ngă bruă ti Việt Nam mơ̆ng lu thŭn hŏng anei leh. Khua lăn čar čang hmăng ZTE srăng mâo klei hgŭm kjăp tŭ jing hĭn hŏng phung duh mkra ti Việt Nam êdei anăp, đru hlăm bruă mđĭ kyar mbĭt hlăm klei bi mguôp Việt Nam – China.