Leh knăm tŭ drông, dua čô khua gĭt gai ngă klei blŭ hrăm. Anei jing gưl hriê čuă klă klơ̆ng Việt Nam tal êlâo mơ̆ng Tokayev yap mơ̆ng hruê đĭ păn bruă thŭn 2019, ăt jing gưl hriê čuă Việt Nam tal êlâo mơ̆ng sa čô Khua mil čhil Kazakhstan hlăm 12 thŭn êgao. Việt Nam leh anăn Kazakhstan mkŏ mjing klei mjĕ giăm hlăk hruê 29/6/1992.

Thŭn dih, dua ala čar bi hdơr 30 thŭn mkŏ mjing klei mjĕ giăm. Mơ̆ng hruê klei kuôl kă mnia mblei êngiê Việt Nam – Êpul hgŭm bruă duh mkra Asi – Ơrôp (EAEU), mâo dŭm ala čar Armenia, Belarus, Kazakhstan, Russia leh anăn Kyrgyzstan dưi ba yua ti thŭn 2016, hnơ̆ng mnia mblei 2 tĭng Việt Nam – Kazakhstan đĭ kah knar 28% sa thŭn. Hnơ̆ng klei mnia mblei 2 tĭng thŭn 2022 mâo giăm 600 êklăk dolar Mi. Dua tĭng dưi mâo mta kñăm ba klei mnia mblei đĭ 1,5 êklai dolar Mi ti thŭn 2030.