Tŭ klei iêo jak mơ̆ng Khua lăn čar Võ Văn Thưởng, Pô mâo ênŭm klei dưi Australia David Hurley leh anăn mô̆ gơ̆ klă klơ̆ng hriê čuă Việt Nam mơ̆ng hruê 3-6/4. Leh knăm tŭ drông, Khua lăn čar Võ Văn Thưởng leh anăn pô mâo ênŭm klei dưi Australia srăng mâo klei blŭ hrăm, bi klă dŭm boh tŭ dưn dưi mâo leh anăn ba mdah dŭm hdră êlan mtrŭt mđĭ klei bi mguôp 2 ala čar hlăm wưng kơ anăp.

Việt Nam leh anăn Australia mkŏ mjing klei mjĕ giăm mơ̆ng thŭn 1973, mđĭ klei bi mguôp ƀĭng hgŭm kluôm ênŭm ti thŭn 2009, ƀĭng hgŭm kluôm dhuôm mđĭ hnơ̆ng ti thŭn 2015 leh anăn mđĭ jing ƀĭng hgŭm bi mguôp hdră êlan ti mlan 3/2018. Australia jing sa hlăm phung ƀĭng hgŭm 2 tĭng mkăp brei ODA amâo mâo lŏ wĭt mă prŏng hĭn kơ Việt Nam. 50 thŭn êgao, Australia đru mkăp ODA kơ Việt Nam jih jang mâo 3 êklai dolar Australia, knar hŏng 47 êbâo êklai Việt Nam. Ară anei mâo hlăm brô 31.000 hđeh sang hră gưl prŏng, phung hriăm kơ klei ksiêm duah Việt Nam dôk hriăm ti Australia (90% jing phung čŏng pô).