Hlăm gưl hriê čhưn klă sĭt ti Việt Nam mơ̆ng Khua  mil čhil Kazakhstan, aguah 22/8, Khua lăn čar Võ Văn Thưởng leh anăn Khua mil čhil Kazakhstan hrăm mbĭt nao dlăng dŭm mta dhar kreh jăk  siam Việt Nam mơ̆ng bruă mkra hŏng lăn čuh  ti ƀuôn bruă mkra mnơ̆ng hŏng lăn čuh Chu Đậu, kdriêk Nam Sách, čar Hải Dương. Hlue si Khua mil čhil Kazakhstan, ñu pioh leh lu mmông ksiêm hriăm kơ dhar kreh Việt Nam leh anăn thâo kơ dŭm mta mnơ̆ng dhơ̆ng hŏng lăn čuh anei mâo mơ̆ng dŭm êtuh thŭn êlâo, bi êdah klei dhar kreh jăk siam, lač kơ klei hdĭp grăp hruê ăt msĕ mơh ênoh yuôm bhăn mnuih Việt Nam.

Khua lăn čar Võ Văn Thưởng leh anăn Khua  mil čhil Kazakhstan ăt ksiêm hriăm kơ ƀuôn bruă djuê ana đưm hing ang ti kwar Dưr mơ̆ng bruă lông mmuôn lăn, bi êdah klei čang hmăng kơ alŭ wăl leh anăn phung thâo mbruă srăng kriê pioh, mđĭ lar dŭm ênoh yuôm mơ̆ng ƀuôn bruă dôk mâo kyia mnơ̆ng mkra hŏng lăn čuh Chu Đậu ăt jing klei bi knăl mơ̆ng bruă mkra mnơ̆ng hŏng lăn čuh jiă kma klei mĭn mnuih Việt, bi knăl kơ klei hdĭp mda krĭng dap mnai krông Hồng.