Hlăm hră mâo kdrêč “Knăm mlan pur jing tết mơ̆ng phung hđeh. Grăp wưng knăm mlan pur, phung hđeh lŏ dưi hlăp lêñ, mbĭt hŏng aduôn aê, amĭ ama huă ƀơ̆ng dlăng mlan, hrăm mbĭt dlăng kơ klei yuôm bhăn hlăm ai tiê, rông ba dŭm klei mĭn hđeh lăk”. Knăm mlan pur jing tết mơ̆ng klei khăp leh anăn kah mbha, jing wưng phung khua asei bi mtă mtăn brei uêñ mĭn lu hĭn kơ phung hđeh hŏng klei khăp, bruă klam leh anăn dŭm mta bruă klă klơ̆ng. Boh nik jing uêñ mĭn kơ phung hđeh mâo klei hdĭp dleh dlan, hđeh êrĭt amĭ ama, hđeh krĭng taih kbưi, krĭng knông lăn, plao ksĭ…čiăng kơ jih jang phung hđeh dưi drông Knăm mlan pur kluôm ênŭm, dưi hriăm leh anăn hlăp lêñ hlăm klei khăp gŏ sang, yang ƀuôn. Kâo mgei ai tiê leh anăn ktưn hưn êjai hlăm wưng êgao, phung hđeh mâo lu klei đĭ kyar, ngă lu bruă jăk, khăp kơ amĭ ama, aduôn aê, thâo đru leh anăn juh phung amâo mâo myun. Kâo hmăng hmưi phung hđeh lŏ dơ̆ng rông ba klei hmăng hmưi, khăp kơ gŏ sang, thâo mpŭ, thâo bi mguôp, bi đru hdơ̆ng pô, bi ktưn ngă êbâo bruă jăk, năng jing phung anak thâo gưt, hđeh sang hră thâo, jing čô thâo gưt mơ̆ng Awa Hồ”.

Aguah 27/9, K’iăng Khua lăn čar, Khua Êpul gơ̆ng keh đru kơ phung hđeh Việt Nam Võ Thị Ánh Xuân nao čhưn, mđup brei mnơ̆ng kơ phung hđeh ti Anôk đru ba ala ƀuôn čar Dak Lak. Tinei, K’iăng Khua lăn čar Võ Thị Ánh Xuân êmuh hrăm, mđĭ ai leh anăn mđup brei mnơ̆ng jing ƀêñ kơ phung hđeh leh anăn mđup brei 50 êklăk prăk kơ Anôk bruă răng mgang phung hđeh čar Dak Lak čiăng đru kơ phung hđeh mâo klei hdĭp amâo myun dôk hdĭp mda leh anăn hriăm hră ti anôk bruă. K’iăng Khua lăn čar Võ Thị Ánh Xuân bi mni kơ klei tŭ dưi mâo mơ̆ng phung knuă druh, phung mă bruă mơ̆ng Anôk bruă đru kơ phung hđeh čar Dak Lak hlăm wưng êgao.

Dŭm bruă mă mơ̆ng Anôk bruă đru bi mklă hdră êlan djŏ klă kơ klei hdĭp mda ala ƀuôn mơ̆ng Đảng, Knŭk kna hlăm bruă kriê dlăng phung khua mduôn dôk hjăn păn amâo anôk knang, phung hđeh êrĭt amĭ ama, ruă duam, amĭ ama lui.