Tlam mbruê 20/10, Khua lăn čar Võ Văn Thưởng leh anăn êpul bi ala gưl dlông Việt Nam wĭt leh ti Hà Nội, mjưh ruê̆ jăk siam gưl nao hlăm klei kƀĭn trông gưl dlông tar rŏng lăn “Ktuê knhal leh anăn êlan” (BRI) gưl tal 3 ti China. Ti ƀuôn prŏng phŭn Bắc Kinh, hlăm hdră nao hlăm klei kƀĭn trông gưl dlông tar rŏng lăn “Ktuê knhal leh anăn êlan”, Khua lăn čar Võ Văn Thưởng nao hgŭm hlăm knăm phŭn pŏk hŏng êbeh 4.000 čô bi ala mơ̆ng êbeh 140 ala čar leh anăn 30 êpul êya tar rŏng lăn hŏng êbeh 20 khua gĭt gai  ala čar, phung khua kiă kriê knŭk kna nao hlăm klei kƀĭn.

Hlăm klei kƀĭn anei, Khua lăn čar Võ Văn Thưởng lač klă klei hâo hưn mñă klă Việt Nam mâo nanao klei sa ai hŏng dŭm klei kčĕ kơ klei êđăp ênang, bi mguôp đĭ kyar alŭ wăl leh anăn tar rŏng lăn. Hlăm anăn mâo klei kčĕ ktuê knhal leh anăn êlan mơ̆ng China kčĕ. Ƀri wưng nao nao hlăm klei kƀĭn, Khua lăn čar mâo lu klei blŭ hrăm, klei bi tuôm hŏng phung khua kiă kriê dŭm ala čar, khua êpul dŭm ala čar, dŭm êpul êya tar rŏng lăn, bi trông kơ dŭm hdră êlan mđĭ boh tŭ dưn klei bi mguôp dua tĭng. Gưl nao hgŭm dưi tŭ jing jăk siam, bi êdah klei ƀuăn ktang mơ̆ng Việt Nam hŏng hdră êlan lu tĭng, mđĭ klei bi mguôp, mkŏ bruă duh mkra hŏng alŭ wăl leh anăn tar rŏng lăn.