Aguah mbruê 6/4, ti Hà Nội, Êpul khua bruă Đảng Phŭn bruă hŏng tač êngao mkŏ mjing klei kƀĭn trông ksiêm wĭt 10 thŭn hluê ngă hdră mtrŭn gưl dlông 8 gưl 11 kơ Hdră êlan răng mgang ala čar hlăm wưng mrâo. Khua lăn čar Võ Văn Thưởng gĭt gai Dhar bruă hŏng tač êngao mtrŭt mđĭ bruă duh mkra hŏng tač êngao mâo boh tŭ dưn, klă klơ̆ng, đru mguôp hlăm bruă mđĭ kyar ala čar, bi lar klei găl, ai dưi ala čar, mđĭ hĭn kơhưm ala čar.

Dhar bruă čiăng lŏ dơ̆ng bi mguôp kjăp hŏng Bruă lĭng kahan, klei êđăp ênang leh anăn dŭm gưl, dhar bruă mđĭ hĭn bruă ksiêm duah, đăo knăl, đru kčĕ hdră êlan čiăng bi djăp ênŭm hnơ̆ng čuăn răng mgang ala čar hlăm wưng mrâo. Amâo mâo mdei bruă mkŏ mjing, ƀuah mkra hlăm Đảng kơ bruă kđi čar, klei mĭn, knhuah hdĭp, mtô mjuăt bi hriăm phung knuă druh, đảng viên kơ bruă kđi čar, klei thâo bruă djăp ênŭm hnơ̆ng čuăn mkŏ mjing bruă hŏng tač êngao Việt Nam kjăp, thơ̆ng kơ bruă, kluôm dhuôm leh anăn mrâo mrang.