Ti krĭng Lăn Dăp Kngư, giăm 1 êklăk 400 êbâo čô hđeh sang hră dŭm gưl bi hơ̆k mơak nao sang hră mphŭn pŏk thŭn hriăm mrâo. Hlăm anăn, čar Dak Lak mâo 500 êbâo čô hđeh sang hră, Gia Lai mâo 368 êbâo čô hđeh sang hră, Lâm Đồng mâo 334 êbâo čô hđeh sang hră, Dak Nông mâo 185 êbâo čô hđeh sang hră leh anăn Kon Tum mâo 166 êbâo čô hđeh sang hră. Boh nik, nai leh anăn phung hđeh sang hră gưl tlâo knŭk kna rông ba hđeh sang hră mnuih djuê ƀiă čar Gia Lai dưi hơ̆k mơak mâo Khua lăn čar Võ Văn Thưởng nao hgŭm hlăm knăm pŏk thŭn hriăm mrâo. Khua lăn čar mñă: Mơ̆ng sang hră khăp hơiêng anei, hđeh sang hră dŭm djuê ana Bahnar, Jrai, Thái, Nùng, Tày, Ê Đê, Xơ Đăng…  dưi đĭ hriê kơ prŏng, đru mguôp ai dưi hnơ̆ng tŭ jăk kơ klei mđĭ kyar bruă duh mkra ala ƀuôn, răng mgang klei êđăp ênang hlăm čar. Hlăm ênoh anăn, mâo lu phung hđeh sang hră jing knuă druh gĭt gai dŭm gưl hlăm čar.

Wưng anei, Khua phŭn bruă bruă mtô mjuăt bi hriăm Nguyễn Kim Sơn  mâo leh mmông mă bruă hŏng knơ̆ng bruă mtô mjuăt bi hriăm čar Gia Lai. Tinei, Nguyễn Kim Sơn mñă kơ bruă mtô mjuăt bi hriăm čar uêñ mĭn kơ bruă mlih mrâo bruă mtô mjuăt bi hriăm, mkŏ mjing klei găl čiăng kơ phung nai mtô hlăm čar mâo klei hơĭt, klei čŏng pô hlăm hdră bi hriăm mrâo.

Aguah hruê 5/9, Nguyễn Trọng Nghĩa, Khua anôk bruă kiă kriê klei hâo hưn gưl dlông nao leh ti knăm ba yua hdră êa doh ti Cù lao Tân Phú Đông, čar Tiền Giang. Nguyễn Trọng Nghĩa mtă kơ phung knuă druh, phung nai mtô lehanăn phung hđeh čar Tiền Giang, hlăm anăn mâo Sang hră gưl dua Tân Phú brei mđĭ hĭn hdră mtô lehanăn hriăm, đru mguôp hlăm hdră mjuăt bi hriăm mnuih thâo kơ ala čar drei. Dŭm gưl bruă Đảng, sang čư̆ êa lehanăn alŭ wăl hluê ngă kjăp klei mtrŭn hlăm bruă mtô bi hriăm mơ̆ng Đảng, Knŭk kna lehanăn Asăp mtă mtăn mơ̆ng Awa Hô, lŏ dơ̆ng mđing dlăng, mjing klei găl kơ hdră mtô bi hriăm, mguôp hdră mtô bi hriăm hŏng hdră mjuăt bi hriăm knhuah hdĭp, mjuăt bi hriăm kơ knhuah khăp čiăng kơ ala čar./.