Tŭ ư asăp jak iêu mơ̆ng Khua gĭt gai Đảng Cộng sản China, Khua gĭt gai China Tập Cận Bình, aguah anei 17/10, Khua lăn čar Võ Văn Thưởng djă akŏ Êpul bi ala gưl dlông Việt Nam nao leh ti Bắc Kinh, nao ti anôk bi kƀĭn trông gưl dlông bi hgŭm quốc tế “Ktuê roh lehanăn Ktuê êlan” tal 3 mơ̆ng hruê 17 truh kơ hruê 20/10.

Anei jing gưl nao mă bruă tal êlâo mơ̆ng Khua lăn čar Võ văn Thưởng truh ti China mơ̆ng leh Việt Nam mkŏ mjing tŭ dưn Klei bi kƀĭn bruă Đảng tal XIII lehanăn China mkŏ mjing tŭ dưn Klei bi kƀĭn bruă Đảng tal XX. Thŭn 2023 ăt jing thŭn bi hdơr 15 thŭn klei bi mjĕ Ƀĭng hgŭm phŭn Việt Nam – China lehanăn bi hdơr 10 thŭn hruê mkŏ mjing lehanăn mđĭ kyar klei mĭn Ktuê roh lehanăn Ktuê êlan. Gưl mă bruă tal anei mơ̆ng Khua lăn čar Võ Văn Thưởng mâo boh tŭ yuôm, bi êdah klei mpŭ, klei mđing tal êlâo mơ̆ng Đảng, Knŭk kna drei hlăm bruă mđĭ hĭn klei bi mjĕ hŏng China./.