Khua lăn čar lač, bruă 2 tĭng lŏ rơ̆ng dŭm klei bi trông êpul, boh nik jing êpul gưl dlông plah wah 2 ala čar, mâo lu boh tŭ dưn yuôm bhăn hlăm bruă mtrŭt mđĭ klei mjĕ giăm 2 ala čar. Khua lăn čar ăt yap yuôm bhăn aduôn Michelle Bachelet hŏng bruă klam khua hlăm dhar bruă klei dưi êngiê anak mnuih mơ̆ng Êpul hgŭm lu ala čar mâo lu klei đru mguôp hlăm dŭm mta bruă mbĭt mơ̆ng Êpul hgŭm lu ala čar leh anăn êpul êya tar rŏng lăn.

Bi kơ klei găl bi mguôp 2 tĭng, aduôn Michelle Bachelet lač, wăt Việt Nam leh anăn Chile jing phung hgŭm hlăm Êpul gơ̆ng klei dưi êngiê anak mnuih mơ̆ng Êpul hgŭm lu ala čar, hrăm mbĭt hgŭm hlăm klei kuôl kă Ƀĭng hgŭm kluôm dhuôm leh anăn đĭ kyar hluh Pacific. Anei jing klei msĕ yuôm bhăn čiăng kơ 2 ala čar mđĭ hĭn klei bi mguôp hlăm wưng kơ anăp. Aduôn Michelle Bachelet ăt mñă kơ 2 tĭng bi mguôp, hriăm mbĭt hluê ngă dŭm mta kñăm mbĭt mơ̆ng Êpul êya tar rŏng lăn kyua klei êđăp ênang leh anăn đĭ kyar.