Hlăm mmông tŭ drông, Khua lăn čar Võ Văn Thưởng hơêč hmưi kơ Campuchia mkŏ mjing tŭ jing jăk siam klei ruah khua Êpul gơ̆ng să, ƀuôn hgŭm gưl tal 5, klam ngă tŭ jing bruă klam khua gĭt gai ASEAN leh anăn AIPA hlăm thŭn 2022, đru kơ bruă klam leh anăn kơhưm mơ̆ng Campuchia đĭ hĭn. Khua lăn čar brei thâo, 2 ala čar mkŏ mjing leh lu gưl nao čuă gưl dlông plah wah 2 Đảng, 2 knŭk kna, hnơ̆ng klei mnia mblei 2 ala čar mâo 2 boh tŭ dưn jăk.

Dŭm mta bruă bi mguôp hlăm bruă duh mkra, mjĕ êrô mnuih ƀuôn sang dưi mkŏ mjing, hlăm anăn mâo klei mjĕ êrô mnuih ƀuôn sang 2 ala čar ti dŭm čar Knông lăn. Khua lăn čar Võ Văn Thưởng sa ai hŏng k’iăng Khua knŭk kna Samdech Krolahom Sar Kheng kơ bruă mtrŭt mđĭ klei bi mguôp krĭng knông lăn hŏng dŭm ƀăng jang knông lăn, bi leh bruă pơ̆ng gơ̆ng knông lăn ti êlan knông lăn, hluê ngăn, mtrŭt mđĭ mkŏ mjing êlan knông lăn êđăp ênang, bi hgŭm, bi mguôp leh anăn đĭ kyar.