Tŭ ư asăp jăk iêô mơ̆ng Khua lăn čar Võ Văn Thưởng, hruê anei, 21/8, Khua mil čhil Kazakhstan Kassym-Jomart Tokayev mphŭn gưl hriê čhưn klă sĭt ti Việt Nam. Anei jing gưl tal êlâo Khua mil čhil Tokayev hriê ti Việt Nam hlăm bruă păn mrâo, ăt jing gưl hriê čhưn tal êlâo mơ̆ng sa čô khua mil čhil Kazakhstan hlăm 12 thŭn êgao, jing klei yuôm bhăn mđĭ hĭn klei bi hgŭm Việt Nam- Kazakhstan, boh nik kơ bruă duh mkra, mnia blei. Hlăm jar hriê čhưn tal anei, dua tĭng srăng bi siñê êbeh 10 klei kuôl kă, hlăm anăn mâo Hdră kčah bi hgŭm ngă bruă kñăm mđĭ hĭn klei bi hgŭm bruă mnia blei.

  Mbĭt anăn jing klei kuôl kă kơ klei lăm lui hră mơar mŭt hlăm ala čar kơ mnuih ƀuôn sang dua nah. Aguah 20/8, Khua mil čhil Kazakhstan Kassym-Jomart Tokayev nao dưm kwang mnga bi hdơr kơ phung lĭng kahan êngia asei leh anăn dưm kwang mnga ti Msat khua gĭt gai Hồ Chí Minh. Leh knăm drông klă sĭt, Khua lăn čar Võ Văn Thưởng hŏng Khua mil čhil Tokayev mâo klei bi trông.