Hlăm mmông bi tuôm, Khua phŭn bruă hŏng tač êngao Bùi Thanh Sơn yap yuôm bhăn pô bi ala Iain Frew mâo leh klei hur har hluê ngă lu bruă 2 tĭng hlăm wưng êgao, êdah hĭn jing bruă 2 tĭng mâo klei bi klă mbĭt kơ Ƀĭng hgŭm bi mguôp hdră êlan (9/2020).

Bruă 2 tĭng bi klă leh anăn dưn yua klei kuôl kă mnia mblei êngiê mơ̆ng Việt Nam – Angle đru ba ala čar Angle jing ƀĭng hgŭm mnia mblei prŏng tal 3 ti anôk mnia mblei Ơrôp, anôk mnia mblei prŏng tal 9 mơ̆ng Việt Nam leh anăn jing pô duh bi liê yuôm bhăn mơ̆ng Ơrôp ti Việt Nam, amâo mâo uêñ kơ klei hmăi mơ̆ng klei ruă tưp Covid-19. Ƀri wưng anei, Khua phŭn bruă hŏng tač êngao Bùi Thanh Sơn mñă kơ pô bi ala Iain Frew lŏ dơ̆ng mtrŭt mđĭ dŭm klei bi mguôp hlăm dŭm mta bruă msĕ si mnia mblei, duh bi liê, mtô mjuăt bi hriăm klei êđăp ênang – bruă lĭng kahan, mbĭt anăn pŏk phai klei bi mguôp hlăm dŭm mta bruă mrâo mơ̆ng Angle mâo klei găl leh anăn guôp hŏng klei đĭ kyar mơ̆ng Việt Nam msĕ si đĭ kyar mtah, bi mdrơ̆ng hŏng klei mlih yan adiê.