Leh hmư̆ dŭm klei hưn mơ̆ng sang hră, Khua phŭn bruă mtô mjuăt bi hriăm Nguyễn Kim Sơn mtă kơ sang hră gưl prŏng Lăn Dăp Kngư srăng dưn yua jih klei găl čiăng mkŏ mjing hdră mtô mjuăt bi hriăm hlăm wưng kơ anăp. Sang hră srăng mđing 2 êpul klei hriăm hluê si klei čuăn hlăm alŭ wăl jing mđĭ kyar klei mrâo mrang, hdră mnêč leh anăn êpul kreh knhâo hŏng nhân văn, đru kơ bruă ksiêm dlăng yang ƀuôn, klei đăo knang, djuê ana, dhar kreh kơ krĭng Lăn Dăp Kngư.

Mbĭt hŏng anăn, sang hră lŏ dơ̆ng mtrŭt mđĭ klei ksiêm duah klei kreh knhâo, bruă mtô mjuăt ti sang hră srăng mkŏ mjing kñăm iêo jak phung hđeh sang hră gưl prŏng, mđĭ hnơ̆ng hrŏng ruah, mâo hdră tă, hdră êlan mrâo hlăm bruă hrŏng ruah phung hđeh hriăm, mâo hdră êlan mđĭ kyar êpul êya phung kreh knhâo, hŏng bruă tiŏ nao phung nao hriăm kñăm mđĭ hnơ̆ng phung mă bruă mâo hnơ̆ng tŭ jăk, iêo jak phung mă bruă mâo hnơ̆ng tŭ jăk wĭt mă bruă.