Hlăm mmông tŭ drông, Khua phŭn bruă lač klă, Việt Nam leh anăn Japon bi mguôp kluôm êlam hlăm lu mta bruă. Khua phŭn bruă Tô Lâm đăo knang, hlăm wưng kơ anăp, klei mjĕ giăm 2 ala čar srăng lŏ dơ̆ng đĭ kyar jăk hĭn.

Khua Phŭn bruă Tô Lâm hmăng hmưi Takebe Tsutomu kah mbha kơ hdră êlan dua tĭng dưi bi mguôp čiăng bi hrŏ klei truh hlăm êlan klông leh anăn klei djiê kyua klei truh hlăm êlan klông ti Việt Nam, ăt msĕ hŏng mtrŭt mjhar dŭm anôk bruă djŏ tuôm mơ̆ng Japon kơ hdră đru, mđĭ ai dưi kơ êpul kahan ksiêm êlan klông Việt Nam. Khua phŭn bruă Tô Lâm ăt mñă kơ Takebe Tsutomu uêñ mĭn mtrŭt mjhar dŭm anôk bruă ksiêm dlăng, ruah mă klei mŭt hriăm kahan ksiêm yang ƀuôn, ăt msĕ hŏng klei mkŏ, bi mguôp plah wah dŭm anôk bruă Phŭn bruă kahan ksiêm hŏng sang hră gưl prŏng Việt Nam – Japon.