Hlăm mmông tŭ drông, Khua lăn čar Võ Văn Thưởng bi êdah klei đăo knang Campuchia srăng mkŏ mjing tŭ jing klei ruah khua Bruă kƀĭn ala ti mlan 7/2023, lŏ dơ̆ng mâo lu boh tŭ dưn hlăm bruă mkŏ mjing ala čar Campuchia êđăp ênang, êngiê leh anăn mdrŏng sah. Việt Nam dlăng yuôm bhăn leh anăn hmăng hmưi lŏ dơ̆ng bi mguôp mđĭ hĭn klei mjĕ giăm, bi hgŭm knhuah gru, bi mguôp kluôm dhuôm, kjăp leh anăn sui hŏng Campuchia. K’iăng Khua knŭk kna, Khua phŭn bruă hŏng tač êngao Campuchia mñă klă, Campuchia dlăng yuôm bhăn klei mjĕ giăm, bi mguôp, bi hgŭm hŏng Việt Nam. Hơêč hmưi kơ dŭm boh tŭ dưn mơ̆ng mnuih ƀuôn sang Việt Nam dưi mâo hlăm klei mđĭ kyar bruă duh mkra ala ƀuôn, bi êdah klei đăo knang Việt Nam srăng bi leh mta kñăm bi mrâo mrang ala čar ti thŭn 2030. 

Ti anôk bruă Knŭk kna, Khua knŭk kna Phạm Minh Chính ăt drông leh K’iăng Khua knŭk kna, Khua phŭn bruă hŏng tač êngao leh anăn bi hgŭm lu ala čar ala mtao Campuchia Prak Sokhonn. Kñăm ba klei bi hgŭm dua ala čar lŏ dơ̆ntg đĭ kyar, ƀrư̆ hruê ƀrư̆ tŭ dưn, Khua knŭk kna Phạm Minh Chính mtă kơ dua tĭng kƀĭn pŏk ngă tŭ dưn klei kuôl kă gưl dlông, klei hưn mtrŭn mbĭt plah wah dua ala čar; mđĭ ktang klei bi hgŭm, mkŏ êlan klông, dua bruă duh mkra, hrăm mbĭt mkŏ mjing bruă duh mkra êngiê mguôp hŏng bruă ñŭ kma lu ala čar pŏk mlar, klă sĭt leh anăn tŭ dưn. 

Hlăm boh klei thŭn 2023 mkŏ mjing lu klei yuôm bhăn ti Campuchia, hlăm anăn mâo ruah khua bruă kƀĭn ala gưl VII, klei bi kƀĭn mjuăt ktang asei mlei Ngŏ Dhŭng Asi tal 32 (SEA Games 32) leh anăn klei bi lông mjuăt ktang phung amâo jăk asei mlei Ngŏ Dhŭng Asi (Para Games), Klei bi kƀĭn gưl dlông tlâo kiêng đĭ kyar Campuchia – Lào – Việt Nam tal 12, Khua knŭk kna bi mklă, hlăm klei dưi pô, Knŭk kna Việt Nam srăng đru, kah mbha klei thâo leh anăn nao ai hŏng Campuchia mkŏ mjing tŭ jing klei bi kƀĭn anei.