Hlăm klei bi kƀĭn, khua gĭt gai dŭm Phŭn, dhar bruă gưl dlông bi trông klă klơ̆ng hŏng dŭm êpul, anôk bruă duh mkra kơ 2 hră mtrŭn anei, lač anei jing klei găl čiăng kơ Knơ̆ng prăk knŭk kna ăt msĕ mơh dŭm phŭn, dhar bruă mđing hmư̆ klei blŭ mơ̆ng anôk bruă duh mkra, ksiêm dlăng bi jăk klei hmăi čiăng duah klei bi knar leh anăn mâo hdră msir djŏ guôp đru kơ anôk bruă duh mkra êjai leh anăn rơ̆ng êđăp ênang kơ anôk bruă ngăn prăk.

Klah čŭn klei bi kƀĭn, K’iăng Khua knŭk kna Lê Minh Khái bi mni kơ phung bi ala dŭm phŭn, dhar bruă, anôk bruă duh mkra, êpul hgŭm bi trông klă mngač čiăng bi mklă bruă brei msir mgaih. Mñă klă, Knơ̆ng prăk knŭk kna mâo 2 bruă klam yuôm bhăn, sa jing gĭt gai hdră êlan ngăn prăk, rơ̆ng ktuê dlăng klei prăk luč ênoh, hơĭt kjăp bruă duh mkra kluôm, mđĭ kyar bruă duh mkra. Dua jing rơ̆ng êđăp ênang dŭm êpul bruă ngăn prăk. Anei jing bruă dleh dlan, brei mâo klei bi mguôp dŭm hdră msir bi jăk, tŭ dưn.