Leh sa thŭn ngă hdră mtrŭn mơ̆ng Phŭn bruă kđi čar kơ krĭng leh anăn bruă knuă mơ̆ng Êpul gơ̆ng gĭt gai Lăn Dap Kngư, êpul gơ̆ng krĭng mâo leh lu mta bruă, ba mdah lu hdră êlan mtrŭt mđĭ klei đĭ kyar Lăn Dap Kngư. Hnơ̆ng GRDP thŭn 2024 mơ̆ng Lăn Dap Kngư mâo êbeh 484 êbâo êklai prăk, GRDP kah knar grăp čô mâo 78,5 êklăk prăk hlăm sa thŭn, đĭ 16% mkă hŏng thŭn 2023.

Hlăm klei kƀĭn, khua gĭt gai dŭm čar Lăn Dap Kngư đru mguôp klei blŭ čiăng mđĭ kyar Lăn Dap Kngư hlăm wưng kơ anăp. Bi klă hlăm mmông mă bruă, k’iăng Khua knŭk kna Nguyễn Hòa Bình mñă ktang, 6 hdră bruă mkŏ mkra dôk hluê ngă čiăng mkŏ Lăn Dap Kngư hŏng dŭm krĭng kñăm. Ƀiădah ară anei knŏn mâo mă hdră mkra êlan klông Dak Lak – Nha Trang dưi ngă jăk, bi 5 hdră adôk jing êmưt, mâo hdră knŏng mrâo mâo 8%. K’iăng Khua knŭk kna mñă kơ dŭm alŭ wăl bi mguôp hŏng dŭm dhar bruă djŏ tuôm čiăng duah hdră ruh mgaih, bi hmar klei ngă bruă, hnưm bi lar klei găl mơ̆ng krĭng Lăn Dap Kngư.