Blŭ hrăm ti anôk bi kƀĭn, K’iăng khua knŭk kna Nguyễn Hòa Bình bi êdah klei mơak leh ƀuh dŭm boh tŭ dưn ƀuôn Ia Nueng mâo leh hlăm thŭn êgao. K’iăng khua knŭk kna bi mni mnuih ƀuôn sang mâo klei thâo bi mguôp, jih ai tiê ba yua klei kreh knhâo hlăm bruă duh mkra pla mjing, mđĭ klei hdĭp mda, đru leh yuôm bhăn hlăm bruă mkŏ mkra krĭng ƀuôn sang mrâo.

K’iăng khua knŭk kna Nguyễn Hòa Bình mtă kơ jih jang bruă kđi čar lehanăn mnuih ƀuôn sang ƀuôn Ia Nueng, să Biển Hồ, ɃP. Pleiku lŏ dơ̆ng mđĭ hĭn knhuah gru, klei thâo bi mguôp ngă jăk hdră mtrŭn mơ̆ng Đảng lehanăn bruă duh mkra ala ƀuôn wưng thŭn 2020-2025, mkŏ mjing klei bi ktưn kkuh mơak klei bi kƀĭn prŏng bruă mặt trận tal 10 lehanăn đru mnuih dôk hlăm klei dleh dlan. Mbĭt anăn, bi kriê pioh knhuah gru dhar kreh, bi kjăp klei đăo knang, klei bi sa ai anăp truh kơ klei ruah khua wưng păn bruă  2025-2027 lehanăn klei bi kƀĭn prŏng Đảng djăp gưl đru rŭ mdơ̆ng ƀuôn Ia Nueng knư̆ hrue knư̆ jăk siam./.