Phŭn bruă êlan klông dŭ mdiăng bi mklă êdeh êdâo êran hŏng pui kmlă jing hdră msir sa anăn čiăng bi hrô kơ êdeh êdâo yua êa xăng, êa pui. Hlăm klei bi kƀĭn, khua gĭt gai dŭm Phŭn bruă bi trông kơ klei bhiăn, hdră êlan đru hŏng êa pui êwa čuh jăk kơ wăl hdĭp mda, mkŏ dưm anôk mbŏ pui kmlă ti ƀuôn prŏng; đru kơ mnuih ƀuôn sang, anôk bruă duh mkra dŭ mdiăng mlih mrô jing êdeh êdâo êran hŏng pui kmlă.

Klah čŭn klei bi kƀĭn, K’iăng Khua knŭk kna Trần Hồng Hà mtă: Phŭn bruă ngăn dŏ leh anăn wăl hdĭp mda mjêč bi leh hnơ̆ng čuăn kơ êwa jhat hŏng êdeh êdâo êran hlăm êlan klông; hnơ̆ng kčah bi mklă dŭm krĭng wăl, alŭ wăl knŏng mâo mrô čhŏ djhan lu brei ngă hdră msir mkhư̆ êdeh êdâo hlăm êlan klông, bi mlih yua êdeh êdâo êran hŏng pui kmlă; ksiêm hriăm gru hmô, klei thâo dŭm ala čar kơ klei bi hgŭm hŏng dŭm êpul bruă dlông rŏng lăn čiăng mâo prăk bi mlih êdeh êdâo êran hŏng pui kmlă.