Ti čar Hậu Giang, K’iăng Khua Knŭk kna Trần Hồng Hà mbĭt hŏng êpul mă bruă Knŭk kna mâo mmông mă bruă hŏng dŭm Phŭn, dhar bruă leh anăn alŭ wăl krĭng Dap mnai krông Cưủ Long kơ mnơ̆ng dhơ̆ng pioh kơ hdră bruă êlan klông phŭn ti alŭ wăl.  Hlue si Phŭn bruă êlan klông dŭ mdiăng, ară anei ti krĭng Dap mnai krông Cưủ Long dôk pŏk ngă duh bi liê 8 hdră bruă êlan dơ̆ng êran pral leh anăn 5 hdră bruă mkra mđĭ, pŏk mlar, mkra mrâo dŭm êlan dơ̆ng ala čar leh anăn kban, hŏng ênoh bi liê hlăm brô 112.600 êklai prăk.

Mơ̆ng ară anei truh 2025, klei čiăng mnơ̆ng pioh mkra mjing hdră êlan êran pral ti krĭng Dap mnai krông Cưủ Long jing čiăng snăk, hlăm brô êbeh 50 êklăk m3. Klah čŭn hlăm mmông mă bruă, K’iăng Khua knŭk kna Trần Hồng Hà brei thâo, hlue si ênoh mrô tĭng yap snăn ênoh mnơ̆ng dhơ̆ng ăt ngă djăp klei čiăng kơ dŭm hdră bruă, năng mđing jing mâo thiăm mnơ̆ng dhơ̆ng jing lăn ti Long An, khădah snăn Phŭn bruă êlan klông dŭ mdiăng brei hnưm mâo klei ksiêm dlăng hdră mnêč mơ̆ng bruă anei. Hŏng dŭm alŭ wăl krĭng Dap mnai krông Cưủ Long, K’iăng Khua knŭk kna mtă brei ptal mđĭ 50% hnơ̆ng dŭm anôk mă čuah ară anei dôk ngă bruă./.