Ti anôk drông anăn, K’iăng khua knŭk kna Trần Lưu Quang bi êdah klei mơak kơ klei hgŭm dua nah Việt Nam-Australia ƀrư̆ hrue mâo klei đĭ kyar hlăm djăp mta bruă, boh nik klei blei mnia mâo klei đĭ kyar ktang truh 16,1 êklai USD hlăm thŭn 2022, đĭ êbeh 30 blư̆ mkă hŏng thŭn 2021, mđĭ Australia jing leh lăn čar hgŭm prŏng dôk tal 10 hŏng Việt Nam lehanăn Việt Nam jing ala čar bi blei mnia prŏng dôk tal 7 hŏng Australia.

K’iăng khua knŭk kna čang hmăng kơ dua nah mâo klei bi hgŭm kjăp hĭn, kñăm čiăng mkŏ mjing klei bi hdơr 50 thŭn hrue mkŏ mjing klei mjĕ mgiăm dua ala čar ti thŭn 2023, hlăm anăn mprăp kơ jih jang bruă bi mjĕ êrô gưl khua kiă kriê hlăm wưng kơ anăp. Tui si hdră êlan mjĕ mgiăm jăk dua nah, dua čô khua kiă kriê mñă klei yuôm bhăn hĭn jing krơ̆ng kơ klei êđăp ênang hơĭt kjăp, lehanăn hgŭm bruă hlăm alŭ wăl lehanăn dlông rŏng lăn, mpŭ kơ bhiăn phŭn Êpul hgŭm lu ala čar lehanăn klei bhiăn kluôm./.