9 mlan êgao, klei êđăp ênang hlăm êlan klông lŏ dơ̆ng mâo lu klei bi mlih jăk mkă hŏng wưng thŭn 2022; klei bi drăm hlăm êlan klông lŏ dơ̆ng dưi mkhư̆. Kluôm ala mâo êbeh 8.300 klei bi drăm hlăm êlan klông, hrŏ 194 klei leh anăn hrŏ 124 čô mnuih djiê mkă hŏng wưng anei thŭn dih. Ênoh gun kpăk hlăm dŭm ktuê êlan klông phŭn hlăm dŭm gưl knăm mơak, tết hrŏ lu mkă hŏng wưng anei thŭn 2022.

K’iăng Khua knŭk kna Trần Lưu Quang lač hdră kñăm hlăm gưl 4 brei bi hrŏ kjham klei bi drăm hlăm êlan klông mơ̆ng 5-10% hlăm jih 3 hnơ̆ng kčah; msir mgaih klei gun kpăk hlăm êlan klông hlăm dŭm êlan phŭn. Hlue si K’iăng Khua knŭk kna, hdră msir đŭ bi kmhal êdei hŏng phung ngă soh hlăm êlan klông mđĭ lar klei tŭ dưn, mbĭt anăn mtă kơ dŭm phŭn, dhar bruă, alŭ wăl kƀĭn hlue ngă 8 êpul bruă klam phŭn čiăng rơ̆ng êđăp ênang hlăm êlan klông.