Tlam mbrue 7/8, ti Hà nội, K’iăng khua knŭk kna Trần Lưu Quang – Khua kiă kriê dhar bruă mdrơ̆ng hŏng klei yan adiê ngă lehanăn tui duah mnuih mâo klei truh, kiă kriê leh klei bi kƀĭn hlue ngă bruă knuă dŭm mlan knhal jih thŭn 2023. Leh 8 mlan êgao, kluôm ala mâo leh truh 1 êbâo 753 klei truh, yan adiê nga djiê lehanăn êka truh 450 čô mnuih; 1 êbâo 176 ha dliê pui ƀơ̆ng, klưh kpŏk čuôr sang truh êbeh 9 êbâo boh, jhat rai truh 45 êbâo ha mdiê lehanăn êtak êbai...mdơ̆ng lehanăn mghaih msir boh mơ̆ng klei jhat truh mâo iêo jak leh truh êbeh 53 êbâo gưl čô mnuih lehanăn êbeh 3 êbâo 633 êdeh êdâo, kdrăp mnơ̆ng yua djăp mta.

Bi êdah ti anôk bi kƀĭn anei, khădah mâo leh klei hâo hưn mtă mtăn, ƀiădah ăt adôk mâo ti dŭm bruă sang čư̆ êa, alŭ wăl lehanăn mnuih ƀuôn sang adôk ka răng, snăn klei truh tơl kreh prŏng luh liê lu kơ mnuih lehanăn ngăn dŏ tơdah tuôm hŏng hlĭm hjan prŏng êa lip lêč... Klah čŭn ti anôk bi kƀĭn, K’iăng khua knŭk kna Trần Lưu Quang tŭ ư hŏng 12 mta bruă mâo kčah leh. K’iăng khua knŭk kna lač, dŭm phŭn dhar bruă lehanăn djăp alŭ wăl lŏ ksiêm bi kjăp, kñăm čiăng lŏ mâo hdră êlan djŏ hĭn mdrơ̆ng hŏng klei yan adiê ngă./.