Hlue si asăp mtă mơ̆ng khua knŭk kna ala čar Mozambique Adriano Maleiane K’iăng khua lăn čar Võ Thị Ánh Xuân mbĭt hŏng êpul khua prŏng Việt Nam nao čhưn leh kơ ala čar Mozambique mơ̆ng hrue 10-13/9/2023. Aguah mbrue 11/9/2023 (tui si mmông alŭ wăl), ti Anôk bruă khua knŭk kna, dua čô khua  kiă kriê mâo leh klei bi trông jăk siam.

K’iăng khua lăn čar Võ Thị Ánh Xuân lač, Việt Nam luôn yap yuôm klei bi mguôp hgŭm mbĭt mâo leh mơ̆ng đưm hŏng  Mozambique, dlăng kơ Mozambique jing sa lăn čar hgŭm jăk êdi hŏng Việt Nam ti   Afrĭk. Dua čô khua kiă kriê nga nanao klei bi tuôm êpul, dŭm gưl, boh nik gưl Đảng, Knŭk kna, lehanăn Bruă kƀĭn ala. Boh nik lŏ mđing hĭn hlăm bruă lŏ hma, mâo wăt bruă rông kan hdang, jing leh bruă hgŭm dôk ngă bŏ hŏng klei tŭ jing, kñăm mkăp djăp mnơ̆ng ƀơ̆ng huă mđrăm mbĭt hŏng tar rŏng lăn./.